Italia ka përmbushur deri më tani vetëm 15% të objektivave të tranzicionit energjetik që duhet të arrijë deri në vitin 2030, duke mbetur pas angazhimeve europiane. Kjo del nga raporti vjetor i organizatës së studimeve klimatike ECCO, i bërë publik të hënën.
Rinovueshmet rriten, por jo mjaftueshëm
Raporti pranon se vendi ka bërë hapa përpara në energjinë e rinovueshme, por ritmi vlerësohet i pamjaftueshëm. Vitin e kaluar Italia shtoi rreth 7 gigavat kapacitete të reja, ndërkohë që për të arritur synimet e vitit 2030 duhen afërsisht 10 gigavat në vit. Ndër pengesat kryesore për zgjerimin e energjisë së pastër përmenden procedurat e ngadalta të miratimit dhe vonesat në lidhjen me rrjetin elektrik.
Emetimet në rritje
Në vitin 2025, emetimet e gazeve serrë u rritën me rreth 9 milionë tonë ekuivalent CO₂ në krahasim me vitin paraardhës. Që të përmbushë objektivat europiane për klimën dhe energjinë, Italia duhet t’i ulë emetimet me rreth 95 milionë tonë ekuivalent CO₂ nga nivelet e 2025-s, një shkurtim që përbën afërsisht 25% të emetimeve kombëtare.
Transporti dhe sektorët e tjerë
Sfida të mëdha mbeten edhe në transport. Vitin e kaluar në Itali qarkullonin rreth 445 mijë makina elektrike, shumë më pak se objektivi prej 4.3 milionësh për vitin 2030. Raporti evidenton gjithashtu vonesa në objektivat e gjelbra për ndërtesat, industrinë, braktisjen graduale të gazit dhe elektrifikimin e konsumit të energjisë.
ECCO e cilëson përparimin si pozitiv, por të pamjaftueshëm. Me vetëm katër vjet deri në afat, Italia duhet të përshpejtojë investimet dhe reformat për të mbajtur angazhimet klimatike.
