Bonot e thesarit me afat maturimi 12-mujor kanë mbetur edhe këtë javë në nivele minimale fare pranë normës bazë të interesit të Bankës së Shqipërisë. Ato u shitën këtë javë me yieldin mesatar të ponderuar 3.11%, me renie minimale nga 3.15% që sishte shënuar në anaknadin e mëparshëm. Yieldet luhaten në këto vlera fare pranë kufirit të normës bazë të interesit që prej periudhës së verës, kur madje arritën edhe vlerën më të ulët prej 3.09%. Për të kuptuar sa e fortë është rënia, kujtojmë se në ankandet parë të janarit të vitit 2023, bonot me afat maturimi 12 mujor regjistruan një yield prej 5.34%. Ato arritën kulmin gjatë nëntorit të vitit 2023, me normë interesi 5.8%.
Shuma e shpallur nga Ministria e Financave në ankandin e kësaj jave ishte 10 miliardë lekë, ndërkohë përsëri ka pasur interes të lartë për të investuar në këtë instrument. Shuma e vënë në dispozicion nga të interesuarit për të blerë bono thesari ishte mbi 13.4 miliardë, duke konfirmuar interesit e lartë që kanë si institucionet ashtu edhe individët për këtë formë investimi.
Ndërkaq, rënia e yield-eve ka qenë e përgjithshme, për të gjitha llojet e maturitete, ndonëse më e dalluar tek yield-i 12-mujor. Me vonesa kohore normale, ajo është përcjellë më pas dhe tek maturitetet afatgjata.
Më specifikisht, bonot me afat maturimi tremujor janë ato që kanë shënuar rënien më të lehtë, nga 3.3% në janar të këtij viti, në 3% maj, ndërkohë që duhet theksuar se nuk ka pasur emetime të këtij instrumenti për periudhën qershor-korrik. Shumë më e fortë është rënia e bonove 6 mujore, yieldi i të cilave nga 4.57% në janar të këtij viti, ka rënë në 3.18% në qershor, duke humbur 30% të vlerës. Ndërkohë që në ecurinë e yieodeve të bonove të thesarit për këtë vit nuk mund të lihet pa përmendur një episod i shënuar gjatë ankandit të fundit të bonove me afat maturimi tre mujor. E gjithë shumë në dispozicion u ble nga një ofertues i vetëm, me norme interesi 1.5%, e cila u konsiderua si ngjarje e pazakontë nga njohësit e këtij tregu.
Lorenc Rabeta /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
