Banka e Shqipërisë e mbylli vitin 2025 me rezultat financiar pozitiv, pavarësisht se forcimi i mëtejshëm i Lekut në kursin e këmbimit vazhdoi të ushtrojë efekt negativ mbi bilancin.
Sipas pasqyrave të audituara financiare të Bankës Qendrore, rezultati financiar neto për vitin 2025 ishte me fitim në vlerën e 2 miliardë lekëve.
Fitimi neto pësoi rënie me 61% krahasuar me një vit më parë, por megjithatë qëndroi në vlera pozitive për të dytin vit radhazi, duke kompensuar pjesërisht humbjet e larta të regjistruara në vitet 2022-2023.
Për vitin 2023, Banka e Shqipërisë kishte raportuar humbje neto në vlerën e 27 miliardë lekëve, ndërsa në vitin 2022 humbjet kishin vlerën e afërsisht 17.7 miliardë lekëve.
Faktori me impaktin kryesor në ecurinë e rezultatit të Bankës së Shqipërisë në vitet e fundit ka qenë efekti i kursit të këmbimit.
Banka e Shqipërisë mban një rezervë të madhe në valutë të huaj, si mjet i domosdoshëm për të përballuar nevojat emergjente që mund të ketë ekonomia dhe sektori financiar.
Duke qenë se bilanci i Bankës së Shqipërisë raportohet në monedhën vendase, forcimi i vazhdueshëm i Lekut në kursin e këmbimit e ka ulur vlerën në monedhën vendase të rezervave të mbajtura në valutë të huaj.
Për vitin 2025, humbjet neto nga ndryshimet e kurseve të këmbimit kishin vlerën e 24.1 miliardë lekëve. Humbjet në këtë zë u rritën me 79% krahasuar me një vit më parë.
Humbjet nga kursi u balancuan pjesërisht nga rritja e vlerës së arit monetar të mbajtur nga Banka Qendrore, si rezultat i rivlerësimit të tij me vlerë tregu në datën e raportimit.
E ardhura nga ndryshimi neto në vlerën e drejtë të arit monetar kishte vlerën e 11.9 miliardë lekëve, në rritje me 109% krahasuar me një vit më parë.
Nëse i referohemi rezultatit të të ardhurave gjithëpërfshirëse të Bankës së Shqipërisë (që përfshijnë zërat që nuk klasifikohen si pjesë e fitimit ose humbjes së vitit ushtrimor), viti 2025 shënoi një rezultat më të lartë, me një vlerë totale prej 3.7 miliardë lekësh. Edhe në këtë zë, rezultati ishte më i ulët krahasuar me vitin 2024, me 52% më pak.
Të ardhurat gjithëpërfshirëse për vitin 2025 përfshinë edhe një ndryshim pozitiv prej 1.7 miliardë lekësh në vlerën e drejtë të letrave me vlerë të borxhit.
Rënia e mëtejshme e normave të interesit edhe gjatë vitit 2025 ndikoi në rritjen e mëtejshme të çmimit të instrumenteve financiare, duke bërë që, për të dytin vit radhazi, totali i të ardhurave gjithëpërfshirëse të rezultojë më i lartë se rezultati neto për periudhën.
Banka e Shqipërisë e mbylli edhe vitin 2025 me kapital negativ, në vlerën e rreth -5.3 miliardë lekëve. Megjithatë, vlera negative e kapitalit u përmirësua për të dytin vit radhazi, krahasuar me nivelin prej -9 miliardë lekësh të fundit të vitit 2024.
Përmirësimi i gjendjes së kapitalit neto ka ardhur falë rezultatit më të mirë financiar të vitit të kaluar dhe shtesave në rezervat ligjore të realizuara. Efektin kryesor e ka sërish një rezervë e posaçme për forcimin e kapitalit. Sipas shënimeve të pasqyrave financiare, rezerva është krijuar me vendimin e Këshillit Mbikëqyrës, datë 4 mars 2026.
Rezerva është krijuar nga fitimi i Bankës, me qëllim forcimin e kapitalit, në kushtet kur, pavarësisht fitimit të realizuar, Banka për një periudhë katërvjeçare ka kapital negativ, shkaktuar kjo nga rivlerësimi i kurseve të këmbimit, si rezultat i vlerësimit të monedhës Lek përkundrejt monedhave të huaja.
Ndërkohë, balanca negative në zërin e rezervave të rivlerësimit të parealizuara është thelluar më tej 2025, duke arritur në afërsisht 73 miliardë lekë, në rritje me 17% krahasuar me një vit më parë. Arsyeja kryesore ishte pikërisht forcimi i Lekut dhe zhvlerësimi i valutave të huaja në rezervën valutore të Bankës së Shqipërisë.
Pavarësisht se gjendja e kapitalit ngelet negativ, Banka e Shqipërisë, në shënimet e pasqyrave financiare vlerëson edhe njëherë se mbetet e mirëkapitalizuar në bazë të kapitalit të realizuar, edhe pse forcimi i monedhës Lek përkundrejt monedhave ku është investuar rezerva valutore, ka gërryer kapitalin e saj.
Sipas Bankës së Shqipërisë, fitimet apo humbjet nga rivlerësimi janë të luhatshme dhe i nënshtrohen faktorëve ekonomikë jashtë kontrollit të drejtpërdrejtë të Bankës së Shqipërisë, që mund të kthehen me ndryshimin e kushteve ekonomike botërore./E.Shehu
Burimi: BSH
Postimi ” BSH e mbylli 2025 me fitim, por forcimi i Lekut solli përsëri ndikim negativ ” eshte marre nga Revista Monitor.
