Enti Rregullator i Energjisë (ERE) ka vendosur të rishikojë çmimin e energjisë elektrike për prodhuesit ekzistues me përparësi, duke zbatuar vendimin e gjykatës që u dha të drejtë prodhuesve në mosmarrëveshjen për bonusin e burimeve të rinovueshme. Efekti financiar i këtij rillogaritjeje vlerësohet në rreth 207 milionë lekë.
Në mbledhjen më të fundit të Bordit të ERE-s u miratua që çmimi të përllogaritet me bonusin 1.3, në vend të koeficientit 1.2 që qeveria kishte vendosur në vitin 2020.
Detyrimet për OSHEE
Rregullatori i ka kërkuar OSHEE-së të raportojë sasitë e energjisë dhe faturat për çdo prodhues të prekur nga vendimi. Kjo përfshin edhe prodhuesit që mund të kenë kaluar në tregun e lirë pas përfundimit të periudhës 15-vjeçare të mbështetjes.
Sfondi i mosmarrëveshjes
Në vitin 2020, qeveria uli bonusin për nxitjen e burimeve të rinovueshme nga 1.3 në 1.2. Ky koeficient është pjesë e metodologjisë sipas së cilës llogaritet çmimi me të cilin shteti blen energjinë nga hidrocentralet me fuqi deri në 15 MW.
Në atë periudhë, Shoqata Shqiptare e Energjisë së Rinovueshme argumentonte se ndryshimi dëmtonte investimet e bëra në sektor dhe cenonte sigurinë juridike të kontratave koncesionare.
