Kosova do të pëfitojë një fond prej 12.3 milionë eurosh nga Fondi Saudit për Zhvillim, fonde që do të përdoren për finalizimin e segmentit rrugor Smrekonicë–Mitrovicë. Ky aks bën pjesë në korridorin më të gjerë që lidh kryeqytetin me qytetin e Mitrovicës.
Sipas të dhënave zyrtare, ky segment ka një gjatësi prej rreth 5 kilometrash dhe përbën fazën përfundimtare të këtij projekti rrugor. Për realizimin e plotë të tij, Republika e Kosovës do të bashkëfinancojë me një shifër prej 3.7 milionë eurosh, duke e çuar vlerën totale të investimit në mbi 16 milionë euro.
Ministri i Infrastrukturës, Dimal Basha, ka bërë të ditur se marrëveshja me institucionin saudit ka zhbllokuar përfundimisht fazën e dytë të këtij projekti. Edhe pse miratimi paraprak ishte dhënë rreth dy vite më parë, formalizimi i marrëveshjes u shty për shkak të ngërçit politik në vend.
Punimet e parashikuara në këtë segment përfshijnë ndërtimin e një rruge moderne me dy korsi në secilin drejtim lëvizjeje, shtimin e korsisë së emergjencës, ndërtimin e katër kryqëzimeve kryesore, si dhe vendosjen e sistemit të kullimit dhe elementeve të tjera të sigurisë rrugore.
Autoritetet vendase theksojnë se mbyllja me sukses e këtij projekti do të kompletojë plotësisht boshtin rrugor Prishtinë–Vushtrri–Mitrovicë. Kjo pritet të përmirësojë ndjeshëm qarkullimin, të lehtësojë transportin dhe të garantojë kushte më të sigurta për lëvizjen e qytetarëve.
Aktualisht, autoritetet po punojnë për hartimin e elaboratit të shpronësimit dhe rishikimin e projektit teknik, ndërsa procesi i tenderimit do të hapet sapo të përfundojnë këto procedura paraprake.
Ky është investimi i dytë që Fondi Saudit për Zhvillim ndërmerr për këtë aks. Më parë, në vitin 2013, ky fond kishte rënë dakord të akordonte rreth 16 milionë dollarë për fazën e parë të projektit.
