Është mjaft e qartë se modeli Galaxy S22 Ultra do të jetë praktikisht një pasardhës i Galaxy Note 20 Ultra të vitit të kaluar, i cili ishte pajisja e fundit Samsung me një vend të caktuar për lapsin shkrues dhe ndihmës S-Pen. Me modelin S21 u vu re që mungesa e një vendi të dedikuar për lapsin S-Pen në trupin e vetë telefonit nuk mund të zëvendësohet nga “xhepat” nëpër kasat, mbulesat dhe mbrojtëset për telefonat.
Galaxy S22 Ultra do të jetë praktikisht një Note22 Ultra me një emër tjetër
Imazhet e para reale me Galaxy S22 Ultra konfirmojnë disa nga thashethemet e mëparshme të tregut, lidhur me dizajnin dhe formën e pajisjes. Duket se Samsung do t’i rikthehet modelit pak më të drejtë të serisë Note, por me të njëjtin ekran dhe me pjesë të mbrapme të lakuar të modeleve Galaxy S. Nëse seria Note do të ekzistonte ende, sigurisht që do të kishte qenë modeli Note22 Ultra.
Dallimet kryesore nga Note20 Ultra duket se do të jenë në zonën e kamerave, ku moduli i madh dhe katror u eliminua në favor të lenteve individuale për çdo kamerë më vete, si dhe për sensorin 3D TOF. Ashtu si në Galaxy S21 Ultra, kemi të bëjmë me katër kamera individuale, dy prej të cilave janë për zmadhimin (zoom). Nga informacionet e disponueshme aktualisht, kamera nuk do të jetë shumë e ndryshme nga ajo e Galaxy S21 Ultra: 108 megapiksel në sensorin kryesor, 12 megapikselë ultrawide, 10 megpaixel me zoonm 3x dhe një kamerë tjetër 10 megapikselë për zoom optik 10x.
Në fund kemi slotet për SIM, slotin USB-C dhe S-Pen, dhe ekrani është përsëri deri në krye të kasës. Samsung duket se nuk po nxiton me adoptimin e teknologjisë “under screen camera” tek modeli në fjalë, duke e ofruar aktualisht vetëm tek modeli i veçantë i Galaxy Z Fold3.
Sigurisht, ky informacion nuk është përfundimtar, por vjen nga burime mjaft të besueshme: Jon Prosser i Front Page Tech, i cili zakonisht jep informacion të saktë për pajisjet që nuk janë publikuar ende.
