Grupi bankar austriak Raiffeisen dhe ai slloven NLB kanë hyrë prej disa muajsh në garë për blerjen e Addiko Bank.
Addiko Bank është një grup bankar austriak, i listuar në Bursën e Vjenës, por me aktivitet kryesisht në vendet e Ballkanit Perëndimor, duke përfshirë Kroacinë, Slloveninë, Serbinë, Malin e Zi dhe Bosnjë-Hercegovinën. Në fund të vitit 2025, Addiko raportonte aktive totale për një vlerë prej 2.4 miliardë eurosh.
Si Raiffeisen, ashtu edhe NLB kanë paraqitur oferta zyrtare për blerjen e 100% të aksioneve të bankës.
Oferta e NLB deri tani është ndjeshëm më e lartë, me vlerën e 37 eurove për aksion. Duke qenë se kapitali aksionar i Addiko përbëhet nga 19.5 milionë aksione, vlera totale e ofruar nga NLB për 100% të aksioneve të Addiko arrin në 721.5 milionë euro. NLB e rriti ofertën ditën e mërkurë nga niveli i mëparshëm prej 33.5 eurosh për aksion, në përpjekje për të bindur aksionarët e Addiko.
Oferta e Raiffeisen deri tani është më e ulët, me një çmim prej 27.5 eurosh për aksion, që përkthehet në gjithsej 536.25 milionë euro për 100% të kuotave të Addiko.
Megjithatë, për momentin Raiffeisen është e favorizuar në këtë proces, sepse oferta e saj është pranuar nga aksionarët që zotërojnë 50.72% të kapitalit të Addiko. Për të ta finalizuar me sukses procesin, nevojitet që oferta të pranohet nga 75% e aksionarëve.
Avantazhi i Raiffeisen deri tani është i lidhur me një marrëveshje që grupi austriak ka lidhur me një nga aksionarët kryesorë të Addiko, serbët e Alta Group.
Gjithashtu, Këshilli Menaxhues i Addiko Bank u ka rekomanduar aksionarëve të pranojnë ofertën e Raiffeisen, duke e argumentuar këtë rekomandim me avantazhin që kjo e fundit ka siguruar deri tani në proces, por edhe me problemet që NLB mund të ketë për të siguruar miratimet e nevojshme rregullatorë, sidomos në Kroaci.
Megjithatë, gara ngelet e hapur, sepse aksionarët kanë të drejtë të tërheqin pranimin e ofertës deri katër ditë para afatit të mbylljes së procesit, që është data 22 korrik 2026.
Rritja e çmimit të ofruar nga NLB duket se synon pikërisht të joshë sidomos aksionarët që kanë pranuar ofertën e Raiffeisen.
Gara për Addiko nuk e prek në mënyrë të drejtpërdrejtë tregun shqiptar, por megjithatë zhvillimet në vendet fqinje janë tregues të një dinamike të re në tregjet bankare të Eurozonës dhe Rajonit të Ballkanit Perëndimor. Disa nga grupet e rëndësishme bankare po i kthehen planeve të zgjerimit, pas një cikli të gjatë konsolidimi dhe daljesh nga tregjet e Europës Juglindore.
Kriza financiare që origjinoi në vitin 2008 solli përkeqësim të situatës financiare të këtyre grupeve, ndërsa paralelisht forcimi i kërkesave për kapital nga autoritetet rregullatorë të Eurozonës e bënë të kushtueshme mbajtjen e filialeve në këto vende.
Por, kthimi i një cikli pozitiv për sektorin bankar europian duket se po risjell një fokus drejt zgjerimit të këtyre grupeve bankare.
NLB ka qenë një ndër grupet më aktive edhe në artikulimin publik të kësaj strategjie. NLB dëshiron zgjerimin e mëtejshëm në tregjet ku është e pranishme, por edhe hyrjen në tregjet e pakta të Ballkanit Perëndimor ku nuk është e pranishme, siç është Shqipëria. Në një intervistë për “Monitor”, CEO i grupit slloven, Blaž Brodnjak tha se NLB është seriozisht e interesuar për të hyrë në Shqipëri, për të plotësuar mozaikun e pranë së saj në rajon.
Burime jozyrtare janë shprehur për Monitor bëjnë të ditur se NLB ka shfaqur interesin konkret te grupet Raiffeisen dhe Intesa Sanpaolo për të blerë filialet e tyre në Shqipëri, por nuk ka gjetur gatishmëri te asnjëri prej dy grupeve për të hyrë në një proces shitblerjeje./ E.Shehu
Postimi ” Grupet e Eurozonës kërkojnë zgjerim të ri në Rajon, Raiffeisen dhe NLB në garë për Addiko Bank ” eshte marre nga Revista Monitor.
