Oferta e Lekut po vazhdon të rritet me ritme të larta edhe në pjesën e parë të këtij viti, e nxitur nga ecuria e mirë e kreditimit të ekonomisë dhe blerjet e vazhdueshme të valutës nga Banka e Shqipërisë.
Statistikat e Bankës së Shqipërisë tregojnë se në fund të muajit prill, rritja vjetore e agregatit monetar M2 ishte 14.4%, me ritme më të larta edhe krahasuar me rritjen prej 13.4% të fundit të vitit të kaluar.
Agregati M2 është rritur me ritme dyshifrore që prej muajit mars 2025, ndërsa ka arritur nivelin maksimal prej 15.3% në shtator të vitit të kaluar. Gjatë muajve në vijim, ritmi i rritjes është zbutur lehtë por ngelet ende në nivele mjaft të larta.
Agregati monetar M2 përbëhet nga paraja jashtë bankave dhe depozitat bankare në Lekë, të përfshira në përkufizimin e parasë së gjerë. Një rritje më e shpejtë e agregatit M2 tregon se në ekonomi po injektohen më shumë para në monedhën kombëtare.
Rritja e lartë e ofertës së parasë mund të shpjegohet kryesisht me kreditimin me ritme të larta i ekonomisë dhe ndërhyrjet e Bankës së Shqipërisë në tregun valutor për të frenuar forcimin e monedhës vendase.
Në fund të prillit, teprica e kredisë për ekonominë arriti në 968.2 miliardë lekë, në rritje me 9.5 miliardë lekë krahasuar me marsin. Me bazë vjetore, portofoli i kredisë për ekonominë është në rritje me 11% krahasuar me një vit më parë.
Normat e ulëta të interesit, ecuria e mirë e ekonomisë reale dhe e bilanceve të sektorit bankar kanë mbështetur rritjen me ritme të shpejta të kredisë në dy vitet e fundit. Kjo ecuri pozitive duket se po vazhdon edhe në muajt e parë të këtij viti. Moderimi i rritjes së kredisë për shtëpi është kompensuar nga rritja e kredisë konsumatore dhe sidomos rritja më e shpejtë e kredisë për biznesin.
Ndërkohë, Banka e Shqipërisë po vazhdon ndërhyrjet në tregun valutor, me qëllim ngadalësimin e forcimit të Lekut. Forcimi i Lekut ka qenë i dukshëm edhe gjatë muajve të parë të vitit, tendencë kjo shumë e zakonshme në seritë e të dhënave historike. Në fund të prillit, Leku zbriti në nivelin e 95.5 lekëve, ndërsa rënia ka vazhduar gjatë tremujorit të dytë dhe në fund të javës së kaluar kursi i Euros arriti minimumin e ri prej 94.2 lekësh.
Banka e Shqipërisë ka ndërhyrë rregullisht gjatë muajve të fundit, me qëllim për ta zbutur këtë tendencë, megjithëse shifrat e blerjeve nuk janë bërë publike.
Ndërsa vitin e kaluar, sipas statistikave zyrtare, Banka Qendrore bleu shifrën rekord të 1 miliard e 27 milionë eurove në tregun e brendshëm valutor. Sasia e valutës së blerë është rritur me 10% krahasuar me një vit më parë. Vlera e përgjithshme e blerjeve përfshin ato të planifikuara, me qëllim rritjen e rezervës valutore, por edhe ato të lidhura me ndërhyrjet direkte në treg, me qëllim për të penguar rënien e mëtejshme të kursit të këmbimit.
Rritja e ofertës së parasë, nga ana tjetër, duket se më në fund është shoqëruar edhe me rritjen e inflacionit, që në maj arriti objektivin prej 3% të Bankës së Shqipërisë. Megjithëse rritja e muajve të fundit ka ardhur nga faktorë të ofertës, kryesisht rritjes së çmimit të karburanteve, një ofertë e lartë e parasë mund të jetë një nga faktorët që po mbajnë të lartë inflacionin brendshëm dhe inflacionin bazë, që vazhdojnë të dominojnë strukturën e inflacionit total në ekonomi./ E.Shehu
Burimi: Banka e Shqipërisë
Postimi ” Injektimi i parasë në ekonomi po rritet me ritme të larta, por nuk po e zhvlerëson dot Lekun ” eshte marre nga Revista Monitor.
