Arritja e objektivëve për furnizim 24 orë me ujë dhe rrjet kanalizimesh deri në vitin 2030 kërkon një vlerë financimi prej rreth 162 mld lekë, 92% e të cilave janë kosto për investime. Por, teksa hendeku financiar rezulton në 10%, shuma tjetër pritet të sigurohet në një masë të madhe nga rritja e tarifave, që pagujanë abonentët. Gjithçka përcaktohet në Strategjinë Kombëtare të Sektorit të Furnizimit me Ujë dhe Kanalizimeve, 2022-2030, që tashmë është publikuar në Fletoren Zyrtare.
Sipas dokumentit, nga tarifat do të mbulohet 45% e kostove totale, ndërsa pjesa tjetër ndahet midis taksave, me 25% të totalit dhe transfertave me 30% të totalit. Ndaj, tarifat e ujit do të rriten me 75%, deri në vitin 2030, ndërsa sipas dokumentit, rritja mesatare e tarifave nuk e prek çështjen reale të përballueshmërisë pasi tarifa mbetet nën pragun që mban në konsideratë Enti Rregullator i Ujit, sipas të ardhurave të familjeve. Madje konsiderohet e përballueshme edhe për 10% e popullsisë me të ardhura më të ulta.
“Për më tepër, tarifa mesatare mbetet tre herë më e ulët se pragu i përballueshmërisë, duke theksuar se ka ende hapësirë për të rritur tarifat me qëllim përmirësimin e performancës financiare të shoqërive”, – thuhet ndër të tjera në dokument.
Ndërkaq, sa I takon objektivëve për t’u arritur parashikohet që furnizimi me ujë të rritet gradualisht, duke arritur në 20 orë, në vitin 2027, 21 orë në vitin 2028, 22.5 orë në vitin 2029 dhe 24 orë në vitin 2030. Ndërohë që, mbulimi me kanalizme nuk do të mundësohet për të gjithë terriotrin, deri në vitin 2030, teksa sipas strategjisë synohet të arrihet në masën 65.5%.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
