Pas sezonit “zero” si pasojë e Covid-19 në vitet 2020–2021 dhe një tjetri – dimrin e kaluar – gjatë të cilit nuk u arritën nivelet e para pandemisë, tashmë ekonomia turistike dimërore e Italisë do të përballet me kostot e energjisë elektrike.
Vëzhguesit e turizmit malor kanë publikuar së fundmi raportin, sipas të cilit në dimrin 2022- 2023 të ardhurat që priten të mblidhen do të jenë në kuotën e 9 miliardë e 514 milion euro, duke shënuar një rritje prej 722 milion eurosh në krahasim me sezonin e kaluar, plus 8.8%.
Por, sipas raportit të ardhurat në fjalë nuk do të ndikojnë në marzhet e fitimit të kompanive, pasi pjesa më e madhe e parave do të shërbejnë për të mbuluar kostot e mëdha të ngrohjes, energjisë elektrike, dhe ushqimit. Pa marrë në konsideratë dhe një seri kostosh të tjera si menaxhimi administrativ dhe ai i personelit. Pra këto të ardhuara nuk do të ndikojnë në përmirësimin e situatës së sipërmarrjeve në këtë sektor, të cilët rrezikojnë një tkurrje të mëtejshme me më shumë se 10%.
Sipas të dhënave të raportit do të jenë 4 miliardë e 351 milion fitimet e sistemeve pritëse të strukturave të hotelerisë. 4 miliardë e 38 milion euro janë të ardhurat nga shërbime si marrja me qera e mjeteve, apo ndihma e instruktorëve të skive, impianteve etj.
Në fund do të jetë 1 miliard e 125 milion euro shuma e të ardhurave nga shërbime të tjera si restorantet, tregtia, aktivitete rekreative dhe të zbavitjes etj.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
