Në Kroaci, 16,843 qytetarë u kthyen ose u zhvendosën në vend gjatë vitit të kaluar, por vetëm 474 prej tyre kanë përfituar deri tani nga lehtësia e re e tatimit mbi të ardhurat, e krijuar për të nxitur kthimin e emigrantëve.
Masa zbatohet për shtetasit kroatë që janë kthyer nga vende të Europës ose nga jashtë saj pas 1 janarit 2025, pasi kanë jetuar të paktën dy vite rresht jashtë vendit, si dhe për emigrantët dhe pasardhësit e tyre që plotësojnë kushtet e përcaktuara.
Sipas të dhënave të Ministrisë së Brendshme dhe Administratës Tatimore të Kroacisë, deri tani 10,810 persona janë njohur si të kthyer për qëllime tatimore.
Nga ky numër, 2,607 persona kanë pasur të ardhura nga punësimi gjatë vitit 2025, ndërsa vetëm 474 tatimpagues kanë përfituar deri tani ulje të tatimit vjetor mbi të ardhurat.
Autoritetet sqarojnë se kjo nuk do të thotë se pjesa tjetër e të kthyerve janë të papunë. Një pjesë mund të jenë të vetëpunësuar ose të kenë forma të tjera të ardhurash që nuk klasifikohen si të ardhura nga punësimi dhe për rrjedhojë nuk përfitojnë nga masa.
Edhe 8,203 persona të regjistruar si të kthyer, por që nuk kanë pasur të ardhura nga punësimi në 2025, do të mbeten në bazën e të dhënave të Administratës Tatimore për katër vitet e ardhshme. Ata mund të përfitojnë nga lehtësia nëse gjatë kësaj periudhe sigurojnë të ardhura nga punësimi dhe plotësojnë kushtet e tjera.
Sipas të dhënave statistikore kroate, mes 16,843 qytetarëve që u kthyen ose u zhvendosën në Kroaci gjatë vitit të kaluar, 10,579 ishin të moshës 20-54 vjeç, ndërsa 2,068 ishin fëmijë dhe të rinj deri në 19 vjeç.
Të dhënat vijnë në një kohë kur Kroacia po përpiqet të zbusë pasojat afatgjata të emigracionit dhe rënies së popullsisë. Viti 2025 ishte i pari që prej vitit 2013 kur numri i qytetarëve kroatë që u kthyen në vend ishte më i lartë se numri i atyre që u larguan, sipas të dhënave të cituara nga Večernji list.
Postimi ” Kroaci, 16,843 qytetarë u kthyen në vitin 2025, vetëm 474 përfituan lehtësi fiskale ” eshte marre nga Revista Monitor.
