Kuvendi i ka kërkuar Entit Rregullator të Ujit (ERRU) të luajë një rol më të fortë në mbikëqyrjen e performancës së shoqërive të ujësjellës-kanalizimeve, duke vënë në dukje se tarifat e shërbimit janë rritur pa u shoqëruar me përmirësime të dukshme në treguesit e punës së operatorëve.
Mungon sistemi i të dhënave
Në një seancë dëgjimore të zhvilluar në komisionin për Burimet Natyrore, Infrastrukturën dhe Zhvillimin e Qëndrueshëm, deputetët ngritën pyetjen pse ende nuk është krijuar sistemi që siguron mbledhjen e të dhënave të sakta dhe të besueshme nga operatorët, një kusht bazë për monitorim efektiv.
Po ashtu, u kërkua zgjerimi i kompetencave të ERRU-së për të ndjekur investimet në sektorin e ujësjellës-kanalizimeve, çka kërkon edhe ndryshime ligjore.
Pak ankesa nga konsumatorët
Kritika u drejtuan edhe për numrin e ulët të ankesave të konsumatorëve, i cili sipas deputetëve nuk pasqyron problemet reale të shërbimit. Prandaj rregullatori u ftua të shtojë përpjekjet për të informuar qytetarët se mund t’i drejtohen ERRU-së kur nuk gjejnë zgjidhje te operatorët.
Qëllimi i këtyre kërkesave është rritja e përgjegjshmërisë së ujësjellësve, përmirësimi i cilësisë së shërbimit dhe garantimi që tarifat që paguajnë qytetarët të sjellin rezultate konkrete, përfshirë furnizimin me ujë dhe uljen e humbjeve në rrjet.
