Zgjerimi i hovshëm i turizmit në bregdetin e jugut po shoqërohet me kosto të reja për infrastrukturën publike. Ngritja e resorteve, hoteleve dhe komplekseve të vilave, përfshirë ato me statusin e investitorit strategjik, ka shtuar ndjeshëm ngarkesën në rrjetet ekzistuese, duke bërë të domosdoshme ndërhyrjet në furnizimin me ujë dhe pastrimin e ujërave të zeza. Zona e Jalës, e cila është kthyer në një kantier të madh ndërtimesh turistike gjatë viteve të fundit, do të përfitojë një fond prej rreth 8.49 milionë eurosh për ngritjen e një impianti të trajtimit të ujërave të ndotura dhe rrjetit të kanalizimeve.

Shoqëria Rajonale e Ujësjellës-Kanalizimeve në Vlorë ka shpallur procedurën e prokurimit më 12 tetor, duke caktuar një fond limit prej 778.7 milionë lekësh pa TVSH. Sipas afateve të përcaktuara në dokumentacion, realizimi i punimeve pritet të zgjasë për një periudhë prej 18 muajsh. Relacioni teknik që shoqëron këtë projekt vë në dukje se hovi i ndërtimeve turistike ka ecur përpara në mungesë të një infrastrukture të integruar për menaxhimin dhe pastrimin e ujërave të ndotura.

Në relacion shpjegohet se Jali ka përjetuar një zhvillim të shpejtë ndërtimi, me lëshimin e lejeve për struktura të reja akomoduese, resorte dhe fshatra turistikë. Megjithatë, rrjeti i kanalizimeve aktualisht rezulton i fragmentuar dhe i paplotë. Shumica e ndërtesave ekzistuese dhe bizneseve të zonës vazhdojnë të mbështeten te gropa septike ose depozita individuale. Këto mangësi theksohen më shumë gjatë stinës së verës, kur numri i pushuesve rritet ndjeshëm.

Dokumentet zyrtare dëshmojnë se mbingarkesa e sistemeve të deritanishme ka çuar në shkarkimin e ujërave të ndotura në mjedis, përfshirë përrenj që derdhen në det. “Zhvillimi intensiv turistik, i kombinuar me mungesën e një sistemi të centralizuar të kanalizimeve dhe një impianti të trajtimit të ujërave të ndotura, ka rritur ndjeshëm presionin mbi ekosistemin lokal”, nënvizohet në relacion. Gjatë hartimit të projektit në vitin 2025, disa nga komplekset turistike në Jalë nuk kishin përfunduar ende dhe sistemet e brendshme nuk ishin finalizuar.

Për këtë arsye, projekti përfshin ndërtimin e kolektorëve kryesorë dhe sekondarë, të cilët do të bëjnë të mundur lidhjen e mëvonshme të objekteve me rrjetin e centralizuar. Impianti dhe kanalizimet janë llogaritur për një popullsi prej 6,100 banorësh, duke marrë parasysh fluksin e sezonit turistik. Megjithëse kapaciteti perspektiv parashikohet në 8,387 banorë, projektuesit kanë vendosur nivelin më të ulët për të shmangur mbipopullimin e kapaciteteve në nisje. Ndërhyrja do të përfshijë rrjetin e kanalizimeve, pusetat, impiantin dhe rehabilitimin e rrugëve të dëmtuara nga punimet.