Operatorët turistikë në Vlorë kanë ngritur zërin kundër rritjes së TVSH-së për njësitë hoteliere, e cila pritet të kalojë nga 6% në 10% duke nisur nga 1 janari 2027. Ata kërkojnë që vendimi të rishikohet, duke paralajmëruar se do të sjellë kosto më të larta për bizneset dhe çmime më të shtrenjta për klientët.
Sipas administratorëve të hoteleve në qytetin bregdetar, ndryshimi do ta rëndojë më shumë aktivitetin e tyre dhe do të cenojë konkurrueshmërinë e sektorit.
Presioni nga kursi i euros
Kledjan Binjakaj, administrator hoteli në Vlorë, thekson se sektori po përballon njëkohësisht edhe efektet e rënies së kursit të euros, e cila sipas tij ka goditur ndjeshëm të ardhurat e njësive akomoduese. Ai paralajmëron se kostot shtesë do ta bëjnë më të vështirë konkurrencën me vendet fqinje. Binjakaj shton se kundër vendimit janë shprehur dhjetëra operatorë në gjithë vendin, të cilët kërkojnë rishikimin e rritjes së TVSH-së.
Taksat vendore, shqetësim tjetër
Bizneset ankohen edhe për rritjen e taksave vendore nga Bashkia e Vlorës. Sipas administratorit, detyrimet financiare janë shtuar, por pa u shoqëruar me përmirësim të shërbimeve.
Ndërkohë, shumica e operatorëve turistikë në Vlorë i janë bashkuar një përfaqësie që synon ta kundërshtojë rritjen e TVSH-së përmes procedurave zyrtare dhe ligjore.
