Çmimet e naftës ranë ndjeshëm dhe zbritën nën nivelin e 100 dollarëve për fuçi, ndërsa tregjet reaguan ndaj sinjaleve për një marrëveshje të mundshme mes SHBA-së dhe Iranit, që mund të ulë tensionet në Lindjen e Mesme dhe të rikthejë furnizimet në treg, raportoi Reuters.
Nafta Brent ra nën 100 dollarë për fuçi, duke u zbritur ndjeshëm nga nivelet mbi 120 dollarë të shënuara ditët e fundit, ndërsa nafta amerikane WTI regjistroi gjithashtu rënie të fortë.
Lëvizja reflekton një kthesë të shpejtë të pritshmërive në tregjet e energjisë, të cilat kishin përfshirë në çmime rrezikun e ndërprerjeve të furnizimit për shkak të tensioneve gjeopolitike.
Optimizmi u rrit pas raportimeve për përparim në bisedimet mes Uashingtonit dhe Teheranit, çka mund të çojë në një ulje të përshkallëzimit dhe potencialisht në lehtësimin e sanksioneve ndaj Iranit.
Një zhvillim i tillë do të hapte rrugën për rikthimin e më shumë nafte iraniane në tregjet globale.
Tregu i naftës ka qenë veçanërisht i ndjeshëm ndaj zhvillimeve në rajon, pasi Ngushtica e Hormuzit mbetet një pikë kritike për transportin e naftës, përmes së cilës kalon një pjesë e konsiderueshme e furnizimit global. Çdo sinjal për stabilizim në këtë zonë redukton menjëherë primin e rrezikut që reflektohet në çmime.
Megjithatë, analistët paralajmërojnë se situata mbetet e pasigurt. Edhe pse pritshmëritë për një marrëveshje kanë ulur presionin mbi çmimet, çdo dështim në negociata apo përshkallëzim i ri i tensioneve mund të rikthejë shpejt luhatshmëritë në tregjet e energjisë.
Rënia e çmimeve shihet gjithashtu si një lehtësim i përkohshëm për ekonominë globale, pasi çmimet e larta të energjisë kishin rritur shqetësimet për inflacion dhe ngadalësim ekonomik në shumë vende.
Treguesi Brent gjatë 6 muajve të fundit (USD/fuçi)
Postimi ” Nafta bie nën 100 dollarë për fuçi mes shpresave për marrëveshje SHBA–Iran ” eshte marre nga Revista Monitor.
