16.5 C
Tirana
E shtunë, 15 Qershor 2024

Ndryshime në Ligjin për Turizmin, 1 muaj në konsultim publik – Rëndohen gjobat për abuzuesit, mbështetje me investime pa tendera  

Duhen Lexuar

Qeveria ka vendosur të bëjë ndryshime të thella në administrimin ligjor të sektorit të turizmit. Planifikohet të rëndohen gjobat për të gjithë subjektet abuzuese por në të njëtën kohë shtohen edhe mundësitë për të financuar projekte me mbështetje buxhetore. Madje në rastin e dytë, projektet në turizëm parashikohet të jenë të përjashtuara nga procedurat standarte të tenderimit publik. Këto ndryshime janë vetëm një pjesë e vogël e transformimit të 28 neneve të ligjit në fuqi për turizmin i miratuar në vitin 2015. Drafti me ndryshimet ligjore është nxjerrë tashmë për konsultim publik, dhe qytetarët mund të shprehin vërejtjet e tyre deri në fund të këtij muaji.

Sa i takon dënimit të kundërvajtjeve administrative gjithcka është e përfshirë në ndryshimet e nënit 71 të ligjit aktual. Kështu me ndryshimet e reja parashikohet që kur subjektet hoteliere e ushtrojnë aktivitetin pa certifikatë kategorizimi dënimi financiar me gjobë shkon nga 20 000 deri në 400 000 lekë të reja. Po ashtu gjoba të larta ka edhe për përdorimin e paautorizuar të shenjave dalluese në strukturën akomoduese, hapjen e pikave të agroturizmit pa licensë ose certifikatë përkatëse,  mosafishimi në mënyrë të dukshme të kërkesave të sigurisë në plazhe, moszbatimi i kërkesave për kushtet e higjenës, mungesa e rojeve në plazhe dhe mosdeklarimin e saktë të të dhënave. Në të gjithë këto raste gjobat janë deri në 200 mijë lekë të reja.

Por ligji përvec rëndimit në gjoba parashikon edhe mbështetje për sektorin. Kështu sipas nenit 31 parashikohet që “Ministria përgjegjëse për turizmin dhe Agjencia Kombëtare e Turizmit, financojnë nga fondi buxhetor i miratuar çdo vit projekte të paraqitura nga persona fizikë, juridikë, vendas ose të huaj, projekte në fushën e turizmit me rëndësi të veçantë dhe projekte të ideuara nga vetë Ministria dhe në këtë rast sipas pikës dy të ligjit “Ky fond nuk i nënshtrohet legjislacionit të prokurimit publik”. Parashikohet që për realizmin e projekteve dhe veprimtarive në fushën e turizmit, financimit të shkojë deri në 100% të mbulimit të kostove. Të gjithë këto financime do të miratohen me vendim të Këshillit të Ministrave.

Ndërkohë ndryshimet e tjera ligjore kanë të bëjnë me përcaktimet e termave turistikë si edhe me dhënien më shumë kompetenca për ministrinë e turizmit.

Disa nga këto ndryshime ligjore u paralajmëruan edhe nga kryeministri Edi Rama në një takim që zhvilloi me sipërmarrësit.

Lorenc Rabeta /


Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.

- Reklama -
spot_img
- Reklama -

Artikujt e Fundit

WallStreet.al Deshirojme tju informojme per cdo artikull te ri qe publikojme ne web.
Dismiss
Allow Notifications