16.5 C
Tirana
E diel, 16 Qershor 2024

Në 2023 u shitën më shumë pasuri të paluajtshme Sipas BSH, u preferuan brenda qyteteve dhe në bregdet

Duhen Lexuar

Numri i subjekteve që kanë kryer shitje në gjashtëmujorin e dytë të vitit 2023 shënoi një ulje të lehtë krahasuar me periudhën paraardhëse, ndërkohë që numri i përgjithshëm i pronave të shitura u rrit në 1169.

Sipas sondazheve të kryera nga Banka e Shqipërise me agjencitë imobiliare, rezulton që numri i pronave të shitura nga subjektet e pyetura ishte gjithsej 2319 gjatë vitit 2023.

Numri i pronave të pashitura, si për banesat, ashtu edhe për ndërtesat tregtare, ka vijuar të shënojë rënie. Që prej vitit 2022 ka pasur një rritje të numrit mesatar të pronave të shitura nga çdo agjenci imobiliare. Konkretisht, kjo shifër rezultoi në rreth 7 prona për subjekt gjatë gjysmës së dytë të vitit të shkuar.

Shitja e pronave në zonat më të preferuara brenda qyteteve, ka shënuar një rritje me 11% në të gjithë territorin krahasuar me periudhën paraardhëse. Afërsisht 48% e pronave të shitura kanë qenë në periferi, ose brenda qytetit nga 52% që ishin më parë, ndërsa 9% e pronave kanë qenë të ndërtuara jashtë qytetit krahasuar me 16% të gjashtëmujorit të kaluar.

Çmimet mesatare në zonat qendrore dhe periferike të kryeqytetit u raportuan më të ulëta, ato jashtë qytetit në rritje, ndërsa çmimet mesatare në zonat e tjera dhe ato në bregdet u shfaqën të pandryshuara.

Indeksi i Çmimit për Tiranën rezultoi rreth 10.1% më i ulët në krahasim me nivelin e periudhës paraardhëse dhe 2% më i lartë në krahasim me një vit më parë. Kjo ecuri u diktua nga çmimet mesatare më të ulëta të raportuara për pronat e shitura në qendër dhe periferi të kryeqytetit. Shitjet në këto dy zona përfaqësonin rreth 2/3 e vëllimit të shitjeve të raportuara dhe për këtë arsye kanë përcaktuar ecurinë e çmimeve për kryeqytetin dhe për të gjithë territorin.

Sa i takon qirave, çmimet e këtyre të fundit kanë pësuar rritje si rezultat i kërkesës së lartë për qiramarrje, si për banesa, ashtu edhe për prona tregtare. Aktiviteti i dhënies dhe marrjes së pronave me qira është i përqendruar në rajonin e kryeqytetit dhe veçanërisht në zonën e qendrës.

Ledina Elezi/


Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.

- Reklama -
spot_img
- Reklama -

Artikujt e Fundit

WallStreet.al Deshirojme tju informojme per cdo artikull te ri qe publikojme ne web.
Dismiss
Allow Notifications