Besimi në ekonomi u përmirësua në gusht, i mbështetur kryesisht nga një rritje e fortë e optimizmit në sektorin e ndërtimit, ndërsa tregtia dhe shërbimet gjithashtu shënuan përmirësim.
Treguesi i Ndjesisë Ekonomike (TNE) u rrit me 1.8 pikë gjatë muajit, duke qëndruar 7.4 pikë mbi mesataren historike, sipas vrojtimit të besimit të biznesit dhe konsumatorit të publikuar këtë të martë nga Banka e Shqipërisë.
Përmirësimi u mbështet kryesisht nga ndërtimi, tregtia dhe shërbimet, ndërsa besimi konsumator dha një kontribut më të vogël pozitiv. Industria ishte i vetmi sektor që ndikoi negativisht në treguesin e përgjithshëm.
Ndërtimi regjistroi rritjen më të fortë mes sektorëve. Treguesi i besimit në ndërtim u rrit me 4.7 pikë përqindje në gusht dhe qëndroi rreth 10.3 pikë përqindje mbi mesataren historike.
Përmirësimi erdhi nga të dy komponentët që përdoren për llogaritjen e treguesit: vlerësimi i bizneseve për aktivitetin aktual ndërtues dhe për kontratat porositëse.
Balanca për aktivitetin ndërtues gjatë tre muajve të fundit u rrit në 8.9 pikë përqindje, nga 4.6 në korrik, ndërsa ajo për kontratat porositëse u përmirësua në -23.7, nga -28.7 një muaj më parë.
Në të njëjtën kohë, pritjet e kompanive të ndërtimit për çmimet vijuan rënien. Balanca për çmimet e pritshme zbriti në 10.7 pikë përqindje në gusht, nga 16.5 në korrik, duke vazhduar prirjen rënëse të evidentuar nga vrojtimi.
Besimi në tregti u rrit me 2.1 pikë përqindje, duke qëndruar rreth 11 pikë përqindje mbi mesataren historike. Banka e Shqipërisë e lidhi përmirësimin me vlerësime më optimiste për ecurinë aktuale të shitjeve dhe me pritjet për rritjen e punësimit.
Pritjet e bizneseve të tregtisë për çmimet në të ardhmen, ndërkohë, shënuan rënie.
Edhe shërbimet shënuan përmirësim. Treguesi i besimit në këtë sektor u rrit me 1.8 pikë përqindje dhe qëndroi rreth 7 pikë përqindje mbi mesataren historike. Bizneset raportuan vlerësime më të larta si për nivelin e kërkesës, ashtu edhe për aktivitetin aktual, ndërsa pritjet për çmimet në muajt në vijim ranë.
Në kahun e kundërt, besimi në industri u ul me 1.2 pikë përqindje krahasuar me korrikun, megjithëse treguesi vijoi të qëndrojë 6.4 pikë përqindje mbi mesataren historike.
Rënia u ndikua kryesisht nga vlerësimi më i dobët për kontratat porositëse, ndërsa perceptimi për prodhimin aktual mbeti pothuajse i pandryshuar. Pritjet e industrisë për çmimet në të ardhmen u rritën.
Në anën e konsumatorëve, treguesi i besimit u rrit me 0.8 pikë përqindje në gusht dhe arriti në një nivel 2.2 pikë përqindje mbi mesataren historike. Sipas Bankës së Shqipërisë, treguesi ka rikuperuar plotësisht rënien e regjistruar gjatë dy tremujorëve të parë të vitit.
Përmirësimi u mbështet kryesisht nga vlerësime më pozitive për blerjet e mëdha, si ato aktuale ashtu edhe ato të pritshme. Pritjet për gjendjen financiare personale dhe për situatën ekonomike në të ardhmen, nga ana tjetër, nuk shënuan ndryshime të qenësishme nga korriku.
Vrojtimi i Bankës së Shqipërisë përmbledh treguesit e besimit për industrinë, ndërtimin, shërbimet, tregtinë dhe konsumatorët dhe i agregojnë ata në Treguesin e Ndjesisë Ekonomike, me synimin për të pasqyruar zhvillimet e aktivitetit ekonomik në vend.
Postimi ” Përmirësohet besimi në ekonomi nga rritja e optimizmit të ndërtuesve ” eshte marre nga Revista Monitor.
