Qeveria ka identifikuar vetëm një pjesë të vogël të financimit të nevojshëm për të zbatuar planin kombëtar të përshtatjes ndaj ndryshimeve klimatike, duke lënë të pambuluar mbi 9 miliardë dollarë investime të planifikuara për dekadën e ardhshme.
Dokumenti zyrtar i qeverisë “Plani Kombëtar për Përshtatjen ndaj Ndryshimeve Klimatike, 2026–2036” publikuar këtë tw enjte në Fletoren Zyrtare tregon se nga kostoja totale prej 9.8 miliardë dollarësh për masat prioritare të adaptimit, vetëm një pjesë e kufizuar konsiderohet aktualisht e financuar.
“Nga analiza rezulton se vetëm 7% e kostos totale të masave prioritare të adaptimit është e mbuluar nga burime financiare të identifikuara”, thuhet në plan. Në terma praktikë, kjo do të thotë se rreth 93% e fondeve të nevojshme mbeten ende për t’u siguruar. Dokumenti e përshkruan mungesën e financimit si pengesën kryesore për zbatimin e masave të planifikuara në sektorë të tillë si energjia, transporti, zhvillimi urban, pylltaria dhe bujqësia.
“Ekziston një hendek i konsiderueshëm financiar për zbatimin e masave prioritare të adaptimit”, thuhet në dokument. Autorët e planit vlerësojnë se mobilizimi i fondeve do të kërkojë kombinimin e burimeve publike, investimeve private dhe mbështetjes nga institucionet financiare ndërkombëtare.
Dokumenti identifikon një sërë mekanizmash që mund të përdoren për të mbuluar hendekun financiar, përfshirë fondet klimatike ndërkombëtare, grantet e donatorëve dhe instrumentet financiare të zhvillimit.
“Mobilizimi i financimit klimatik mbetet një element kyç për realizimin e objektivave të adaptimit”, thuhet në plan.
Sipas dokumentit, pjesa më e madhe e investimeve është përqendruar në projekte me kosto të lartë infrastrukturore, të cilat kërkojnë financim shumëvjeçar. Në plan theksohet se kapacitetet aktuale fiskale të institucioneve publike nuk konsiderohen të mjaftueshme për të mbuluar të gjithë nevojën për investime.
“Nevojitet një qasje e koordinuar për të rritur aksesin në burimet e financimit klimatik kombëtar dhe ndërkombëtar”, thuhet në dokument.
Qeveria argumenton se investimet në adaptim mund të reduktojnë kostot e ardhshme të lidhura me fatkeqësitë natyrore dhe dëmet ekonomike nga ndryshimet klimatike. Plani pranon se sigurimi i fondeve mbetet kushti kryesor për realizimin e objektivave.
“Mungesa e financimit mund të kufizojë ndjeshëm zbatimin e masave të planifikuara”, thuhet në dokument. Sipas planit, hendeku financiar është i pranishëm pothuajse në të gjithë sektorët e analizuar, me nivele të ndryshme ekspozimi. Autorët e dokumentit argumentojnë se financimi klimatik duhet të integrohet gradualisht në proceset e planifikimit buxhetor dhe investimeve publike.
“Integrimi i konsideratave klimatike në planifikimin financiar dhe buxhetor është thelbësor për rritjen e reziliencës”, thuhet në plan.
Postimi ” Përshtatja klimatike, qeveria “gjen” vetëm 7% të fondeve për planin 9.8 miliardë USD ” eshte marre nga Revista Monitor.
