Tvsh e reduktuar për prodhimet për fëmijë dhe për higjenën personale, por jo për prodhimet bazë. Për këto të fundit u miratua karta sociale që do të ndihmojë personat me të ardhura të pakëta. Qeveria e Italisë ka miratuar në këtë mënyrë buxhetin prej 35 miliardë eurosh për vitin 2023, por dhe buxhetin afatmesëm për 2023-2025.
Për pensionet tashmë do të aplikohet “kuota 103”, që nënkupton rritjen e pensioneve minimale, bonus për ata që zgjedhin të qëndrojnë në punë dhe pse kanë arritur moshën e pensionit, si dhe për nënat në bazë të numrit të fëmijëve që kanë. Nga buxheti prej 35 miliard eurosh, dy të tretat do të përdoren për emergjencën e krijuar nga kriza energjitike, dhe mbështetjen e shtresave më të brishta të shoqërisë. Kryeministrja Giorgia Meloni e komentoi këtë si një manovër të guximshme për të promovuar rritjen ekonomike si dhe për të ndihmuar familjet dhe sipërmarrjet.
Ministria e ekonomisë me anë të një deklarate për mediat sqaroi se miratimi i buxhetit është një dispozitë që bazohet në një qasje “të matur dhe realiste” që merr parasysh situatën ekonomike por edhe “të qëndrueshme për financat publike”.
Për të vetëpunësuarit rritet pragu i taksës së sheshtë – në 85 mijë euro- i cili futet edhe si një taksë rritëse.
Ndërkohë do të ketë stimuj për të inkurajuar punësimin e të rinjve, një kërkesë e hershme e Forza Italia, për kompanitë që punësojnë gra nën 36 vjeç.
Burimet e destinuara masat kundër shtrenjtimit të energjisë për tre muajt e parë të 2023-shit, që do të lejojnë më shumë ndihma për familjet dhe sipërmarrjet duke zgjeruar platenë e përfitësuesve, shkojnë deri në 21 miliard euro.
Për familjet më të brishta do të përforcohet mekanizmi i cili lejon marrjen e bonusit social për faturat deri në 15 mijë euro.
U miratua gjithashtu dhe një fond prej 500 milion eurosh për krijimin e një karte kursimi për blerjet, për familjet që kanë deri në 15 mijë euro të ardhura në vit. Këto karta do të menaxhohen nga bashkitë dhe do të shërbejnë vetëm për blerjen e prodhimeve të domosdoshme.
Gjithashtu do të ketë ndihmë shtesë për familjet me tre apo më shumë fëmijë si dhe për personat me aftësi të kufizuara.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
