Numri i përdoruesve të telefonisë mobile në Kosovë ka vazhduar të rritet, ndërsa transporti ajror ka shënuar rënie si në numrin e fluturimeve ashtu edhe të udhëtarëve.
Statistikat e muajit maj 2026 tregojnë zhvillime të ndryshme në sektorët e transportit dhe telekomunikimit.
Ndërsa telefonia mobile dhe fikse kanë shënuar rritje të numrit të përdoruesve, transporti ajror ka regjistruar rënie si në numrin e fluturimeve ashtu edhe të udhëtarëve. Në anën tjetër, transporti hekurudhor ka shënuar një rritje të lehtë të numrit të udhëtarëve.
Agjencia e Statistikave të Kosovës ka publikuar statistikat mujore për transportin ajror, transportin hekurudhor dhe telekomunikimin për muajin maj 2026, të cilat tregojnë se sektorët nuk kanë ecur me të njëjtin ritëm gjatë kësaj periudhe.
Në transportin ajror, gjatë muajit maj janë realizuar gjithsej 1.099 fluturime, që paraqet një rënie prej 6 për qind krahasuar me muajin maj të vitit 2025. Sipas ASK-së, tkurrje është regjistruar edhe te numri i udhëtarëve që kanë shfrytëzuar transportin ajror.
Në total, gjatë muajit maj janë evidentuar 366.360 udhëtarë, ose 4 për qind më pak krahasuar me periudhën e njëjtë të vitit të kaluar. Këto të dhëna tregojnë se, ndonëse Aeroporti Ndërkombëtar i Prishtinës vazhdon të mbetet pika kryesore e lëvizjes ajrore në vend, muaji maj ka shënuar një ngadalësim në aktivitet krahasuar me vitin paraprak.
Ndryshe paraqitet situata në transportin hekurudhor. Sipas statistikave zyrtare, 8.628 udhëtarë kanë shfrytëzuar trenin gjatë muajit maj, që paraqet një rritje prej 1,6 për qind në krahasim me të njëjtën periudhë të vitit 2025.
Sa i përket transportit të mallrave me hekurudhë, gjatë muajit maj janë transportuar 182 ton mallra, duke reflektuar aktivitetin e këtij segmenti të transportit.
Edhe sektori i telekomunikimit vazhdon të shënojë rritje të numrit të përdoruesve.
Në telefoninë fikse, numri i përdoruesve në muajin maj 2026 arriti në 70.816, që paraqet një rritje prej 3,4 për qind krahasuar me muajin maj të vitit të kaluar.
Megjithatë, ndonëse baza e përdoruesve është zgjeruar, përdorimi i shërbimeve të telefonisë fikse ka vazhduar të bjerë. Trafiku i realizuar në këtë rrjet ishte 1.789.637 minuta, ose 4,1 për qind më pak se në të njëjtën periudhë të vitit 2025, duke reflektuar trendin e vazhdueshëm të orientimit të qytetarëve drejt telefonisë mobile dhe komunikimit përmes internetit.
Rritja më e dukshme vazhdon të regjistrohet në telefoninë mobile.
Sipas ASK-së, numri i përdoruesve me parapagim (Prepaid) gjatë muajit maj 2026 arriti në 1.516.860, duke shënuar një rritje prej 2,72 për qind krahasuar me të njëjtën periudhë të vitit të kaluar.
Po ashtu, është rritur edhe numri i përdoruesve me kontratë (Postpaid), i cili arriti në 318.946, ose 1,65 për qind më shumë krahasuar me muajin maj 2025.
Postimi ” Rriten përdoruesit e telefonisë mobile në Kosovë, bien fluturimet dhe numri i udhëtarëve ” eshte marre nga Revista Monitor.
