6.5 C
Tirana
E premte, 23 Shkurt 2024

Sigurimet, rritja e tregut u ngadalësua në muajin tetor

Të dhënat e Autoritetit të Mbikëqyrjes Financiare (AMF) tregojnë se për 10-mujorin primet e shkruara bruto u rritën me 16.5% krahasuar me të njëjtën periudhë të nëj viti më parë.

Duhen Lexuar

Për 9-mujorin rritja kishte qenë rreth 18%. Në muajt e fundit, ritmet e rritjes së tregut të sigurimeve janë reduktuar disi. Kjo lidhet edhe me faktin që në pjesën e parë të vitit një pjesë e madhe e rritjes i detyrohet luhatjes së bazës krahasuese që shkaktoi pandemia gjatë vitit 2020.

Ky efekt ishte veçanërisht i ndjeshëm në gjysmën e parë të vitit. Megjithëse rritja e tregut po ngadalësohet edhe për këtë arsye, sërish rritja ngelet sipër niveleve të regjistruara para pandemisë. Krahasuar me 10 mujorin e vitit 2019, tregu paraqitet në zgjerim me 10.1%, i matur sipas vlerës së primeve të shkruara bruto.

Tregu shqiptar i sigurimeve mbetet kryesisht i varur nga produktet që në mënyrë direkte apo indirekte janë të detyrueshme, kryesisht në segmentin e sigurimeve motorike. Shtimi i numrit të mjeteve në qarkullim, zgjerimi i turizmit hyrës në rrugë tokësore, janë elementë që vetvetiu sigurojnë një rritje graduale të këtij segmenti të tregut. Për 10 mujorin 2021, sigurimet e detyrueshme motorrike ishin dukshëm dominuese dhe sollën mbi 66% të primeve në segmentin më të madh të tregut, atë të jo-jetës.

Normën më të lartë të rritjes po e shfaqin produktet që vitin e kaluar u ndikuan më shumë nga pandemia. Këtë vit primet nga policat kufitare janë rritur me 137.7%, ndërsa ato nga kartoni jeshil me 27.8%. Sigurimi i brendshëm motorik TPL deri tani po shënon një normë rritjeje me 8%. Ndër sigurimet motorike, në rritje shfaqet edhe sigurimi KASKO i automjeteve, me 25.2% më shumë krahasuar me një vit më parë. Ky sigurim ligjërisht është vullnetar, por në pjesën dërrmuese ai lidhet me financimet e automjeteve me qira financiare. Rritja e turizmit këtë vit duket se ka ndikuar në mënyrë të tërhtortë edhe biznesin e makinave me qira dhe produktin e sigurimit KASKO në sigurime.

Në ngadalësim nga rritja e 9-mujorit të parë shfaqet edhe sigurimi i katastrofave. Për 10-mujorin, primet e shkruara bruto arritën vlerën e 1.52 miliardë lekëve, me një rritje prej 34.6% krahasuar me një vit më parë. Në fund të 9-mujorit, rritja kishte qenë 10 pikë përqindje më e lartë. Në numër kontratash, rritja e tregut është edhe më e ulët, rreth 10% më shumë krahasuar me një vit më parë.

Ritme të larta të rritjes këtë vit po shfaq edhe tregu i sigurimit të jetës. Për 10-mujorin, primet e shkruara bruto janë rritur me 24.5% me bazë vjetore. Edhe këtu rritja paraqitet disi më e ulët krahasuar me nivelin 25.2% të 9-mujorit. Tregu vazhdon të dominohet nga sigurimi i jetës së debitorit, ku primet këtë vit janë rritur me 30% dhe përbëjnë pothuajse 70% të totalit të tregut.

Në mënyrë të tërthortë, kjo tregon se tregu i sigurimit të jetës po rritet sidomos falë kredisë për pasuri të paluajtshme, ku sigurimi i jetës së huamarrësit është kusht i kërkuar nga bankat. Edhe për shkak të rritjes së çmimeve të pronave, limitet e përgjegjësive në kontratat e sigurimit të jetës janë rritur, duke gjeneruar më shumë prime për kompanitë e sigurimit.

Burimi:Monitor
- Reklama -
spot_img
- Reklama -

Artikujt e Fundit