Nevojat bazë po marrin një pjesë gjithnjë e më të madhe të buxhetit të familjeve amerikane. Strehimi dhe ushqimi përbënë së bashku gati gjysmën e shpenzimeve gjatë vitit 2025, duke u rritur me ritëm më të shpejtë se shpenzimet e përgjithshme, sipas të dhënave të Byrosë Amerikane të Statistikave të Punës.
Çdo njësi konsumatore shpenzoi mesatarisht 81,905 dollarë në vit, me një rritje prej 4.3% krahasuar me vitin 2024. Në të njëjtën periudhë, të ardhurat mesatare para taksave u rritën me 6.4%, në 110,847 dollarë, ndërsa inflacioni vjetor qëndroi në 2.6%.
Banimi, zëri më i rëndë
Strehimi zuri 33.9% të shpenzimeve totale, me një mesatare vjetore prej 27,790 dollarësh, ose 5.8% më shumë se një vit më herët. Rritja erdhi kryesisht nga kostot e banimit, ndërkohë që shpenzimet për banesat me qira u shtuan me 10.8%.
Shtrenjtimi i proteinave rëndon ushqimin
Ushqimi përbënte 13% të buxhetit familjar, me shpenzime mesatare prej 10,633 dollarësh në vit, në rritje me 4.6% krahasuar me vitin 2024. Ndër faktorët kryesorë ishte rritja e çmimeve të mishit, shpendëve, peshkut dhe vezëve, për të cilat familjet shpenzuan mesatarisht 1,579 dollarë, ose 11.7% më shumë.
Të dhënat e Bloomberg tregojnë se familjet paguan gjithsej 1,988 dollarë më shumë për strehimin dhe ushqimin sesa një vit më parë. Pesha e strehimit në buxhetet familjare arriti nivelin më të lartë që nga viti 2010, ndërsa ajo e ushqimit nivelin më të lartë që nga viti 2011, pa llogaritur luhatjet e periudhës së pandemisë.
Presion i mundshëm edhe gjatë këtij viti
Situata mund të jetë rënduar më tej gjatë këtij viti, pasi të dhënat e sondazhit mbulojnë periudhën përpara luftës me Iranin. Në shtator, inflacioni vjetor arriti në 3.7%, i nxitur edhe nga shtrenjtimi i benzinës.
Shifrat dëshmojnë se kostot e nevojave bazë po zënë gjithnjë e më shumë vend në buxhetin familjar, duke ngushtuar hapësirën për shpenzime të tjera dhe për kursime.
