Bordi i Enti Rregullator i Energjisë ka vendosur të mbajë të pandryshuara tarifat e shpërndarjes së energjisë elektrike për periudhën 1 maj – 31 dhjetor 2026, duke konfirmuar nivelet aktuale për të gjithë segmentet e konsumatorëve si ata në tension të ulët edhe atë në tension më të lartë.
Sipas vendimit nr. 103, datë 14 prill 2026, tarifat e shpërndarjes do të jenë si më poshtë: 6.42 lekë/kWh për konsumatorët në tension të ulët (0.4 kV); 3.99 lekë/kWh për tensionin e mesëm (6/10/20 kV); 1.55 lekë/kWh për tensionin 35 kV
Vendimi sanksionon që këto nivele do të aplikohen pa ndryshime nga 1 maji deri në fund të vitit, duke zgjatur praktikisht regjimin tarifor të aplikuar edhe në muajt e parë të këtij viti.
Në vendimin e tij Enti argumenton se të dhënat e paraqitura nga OSSH për vitin 2025 janë paraprake dhe edhe parashikimet për vitin aktual bazohen tek këto të dhëna por në vijim kompania publike duhet të mbajë parasysh disa aspekte për përmirësim.
“Në vijim të analizës së kryer dhe në zbatim të kuadrit ligjor dhe rregullator në fuqi, vlerësojmë të nevojshme që shoqëria OSSH sh.a. të ndërmarrë masat për përmirësimin e cilësisë dhe detajimit të informacionit të paraqitur për qëllime rregullatore.
OSSH duhet të paraqesë në formë të detajuar kostot operative dhe kapitale, të shoqëruara me shpjegime për luhatjet ndër-vjetore, si dhe e një informacioni të strukturuar mbi investimet e realizuara dhe të planifikuara, në përputhje me parimet e eficiencës dhe transparencës. Në të njëjtën kohë, OSSH sh.a. duhet të paraqesë një analizë të përditësuar të parametrave financiarë, përfshirë koston e kapitalit (ËAÇ), sipas kërkesave të Metodologjisë përkatëse” nënvizon Enti në parashtrimin e vendimit.
Tarifat e shpërndarjes përbëjnë një komponent të rëndësishëm të çmimit final të energjisë, pasi mbulojnë kostot e rrjetit, mirëmbajtjes dhe investimeve dhe mbajtja e tyre në të njëjtin nivel nuk jep asnjë kosto shtesë në faturat e energjisë në vijim të paktën sa i takon këtij zëri. Vendimi hyn në fuqi më 1 maj 2026 dhe do të zbatohet deri më 31 dhjetor 2026./N.Maho
Postimi ” Tarifat e shpërndarjes së energjisë, ERE: Ja nivelet nga 1 maji deri më 31 dhjetor 2026 ” eshte marre nga Revista Monitor.
