14.5 C
Tirana
E premte, 1 Mars 2024

Udhëtimi turistike do të lehtësohen, por kufizimet do të mbeten në vazhdimësi

Udhëtimet turistike ndoshta nuk do të rikuperohen plotësisht e nuk do të arrijnë në nivelet e periudhës para Covid deri në vitin 2024

Duhen Lexuar

Fillimi i pandemisë u karakterizua nga raftet bosh të supermarketeve, pasi zinxhirët globalë të furnizimit u bllokuan nga impulsiviteti i blerjeve të ndikuara nga paniku i krijuar dhe nga ndërprerja e shkaktuar nga Covid-19. Sistemi u rregullua shpejt. Por një mungesë që nuk është përmirësuar është ajo e udhëtarimeve ndërkombëtare. Avionët janë ende gjysmë të mbushur në rastin më të mirë dhe shumë nga aeroportet e botës janë pothuajse bosh. Mbërritjet ndërkombëtare ranë me gati 75% në vitin 2020, sipas Organizatës Botërore të Udhëtimit të OKB-së, me 1 miliardë më pak njerëz që bëjnë udhëtime jashtë vendit. Shifrat për vitin 2021 nuk pritet të jenë shumë më të mira në përgjithësi edhe se në zona apo rajone të ndryshme ka pasur edhe rritje krahasuar me vitet e tjera – ashtu sic ishte rasti i Shqipërisë ku në muajin Shtator të këtij viti ka pasur më shumë udhëtarë se sa në të njëjtën periudhë të vitit 2019 ku Shqipëria ka pasur numrin më të madh të turistëve dhe të hyrje-daljeve nëpërmjet linjave ajrore dhe aeroportit te Rinasit (sh.redaksia). Por perspektivat për vitin 2022 duken më pak të zymta.

Më shumë njerëz do të rizbulojnë kënaqësitë e udhëtimit me avion për të shkuar në një pushim spontan në një qytet tjetër (city-break), për të marrë pjesë në një event familjar të planifikuar prej kohësh ose për të kaluar pushimet e tyre të rastit. Dhe ndërkohë që drejtuesit do të vazhdojnë të shpenzojnë shumë kohë në video-konferencat online, më shumë njerëz do të mbështeten gjithashtu në ndenjëset e klasit të biznesit. Në dekadat para pandemisë, udhëtimet ndërkombëtare u rritën me shpejtësi, ku numri i vizitorëve në vendet e huaja u trefishua midis vitete 1990 dhe 2019. Linjat ajrore low-cost, prosperiteti në rritje dhe më shumë kohë e lirë mbështetën këtë rritje. Këto forca përfundimisht do të rikthejnë veten dhe industrinë e udhëtimeve.

Në fillim të pandemisë, shumica e ekspertëve menduan dhe thanë se udhëtimet ndërkombëtare nuk do të rikuperoheshin në nivelet e 2019-ës para vitit 2023, dhe më shumë gjasa në 2024. Ky duket ende një parashikim i arsyeshëm. Kufizimet në udhëtimet turistike ndërkombëtare janë ende në fuqi dhe po hiqen shumë ngadalë. Tani shumë pak vende në Europë nuk kanë kufizime për vizitorët për qëllime turistike, ndërsa plot 88 vende janë ende të mbyllura plotësisht dhe shumë të tjera kanë politika të forta bllokuese. Por ndërsa normat e vaksinimit rriten dhe infeksionet bien, rregullat do të lehtësohen dhe rrugët do të rihapen. Pjesa më e madhe e popullsisë së botës u ndalua të hynte në Shtetet e Bashkuara të Amerikës derisa rregullat e saj ndryshuan në nëntor – ku prej kësaj të hëne, kanë rinisur udhëtimet për qëllime turistike ne SHBA.

Rimëkëmbja do të jetë e pabarabartë dhe shumë e diferencuar. Udhëtimet e brendshme në shumë shtete të mëdha tashmë janë rikthyer – Amerika po i afrohet niveleve para Covid dhe Kina i ka tejkaluar ato tashmë. Udhëtimi rajonal po rritet. IATA , organi ndërkombëtar më i rëndësishëm i industrisë ajrore botërore, mendon se Europa mund të kthehet në gati 80% të niveleve para pandemisë në vitin 2022. Por rimëkëmbja e Azisë duket të jetë më e ngadaltë dhe mund të vazhdojë të mbetet prapa në pjesën tjetër të botës. Udhëtimet e gjata ndërkontinentale do të mbeten në nivele të ulëta derisa vaksinimet të jenë më të përhapura dhe shumëllojshmëria e rregullave dhe rregulloreve të bëhet më e lehtë për t’u kuptuar.

Rezervimet për pushime rriten sa herë që vendet heqin kufizimet në udhëtimet e huaja dhe nëse nuk shfaqet një mutacion i ri, më i rrezikshëm i Covid-19, kjo kërkesë e madhe e mbyllur do të ndihmojë në mbushjen e avionëve sërish, kryesisht për udhëtime të shkurtra. Megjithatë, bizneset planifikojnë të shpenzojnë më pak për udhëtime. Sondazhet sugjerojnë se buxhetet do të shkurtohen me 20-40%. Ekspertët dhe parashikuesit më të zymtë mendojnë se gjysma e të gjithë udhëtimeve të biznesit mund të jenë zhdukur përgjithmonë. Shumë takime dhe konferenca do të mbeten virtuale, ose të paktën do të zhvillohen në formë hibride me shumë më pak njerëz që marrin pjesë personalisht dhe fizikisht.

Edhe nëse shfaqet një mutacion më virulent i virusit, i cili potencialisht e kthen përsëri gjithçka në të kundërt, do të ketë nga ata që do të vazhdojnë të fluturojnë mbi retë e errëta të vazhdueshme të pandemisë – të pasurit. Kërkesa në rritje për vende në avionë privatë ka të ngjarë të vazhdojë pasi të pasurit anashkalojnë shumë nga barrierat me të cilat përballen masat. Tetë muajt e parë të 2021 panë 2.9 milionë fluturime me avionë biznesi, ose 70% më shumë se në 2020-ën dhe pak më të larta se në 2019, ndërsa fluturimet komerciale ende vuajnë duke qenë në rreth 40% nën nivelet para pandemisë, sipas WingX, një kompani private e specializuar në të dhëna statistikore dhe informacione të aviacion privat.

Nëse kjo nuk është mjaft ekskluzive, një destinacion i ri pa Covid u ngrit në vitin 2021 dhe pritet të mirëpresë shumë më tepër vizitorë në vitet e ardhshme. Nëse keni disa qindra mijëra dollarë për të harxhuar, mund të rezervoni një biletë për një fluturim në hapësirë.

- Reklama -
spot_img
- Reklama -

Artikujt e Fundit