Dubai Expo 2020 është një ekspozitë botërore e cila ka filluar më 1 tetor 2021 dhe do të vazhdojë deri më 31 mars 2022. Ajo përfshin disa nga idetë më inovatore të arkitekturës dhe të dizajnit. Ekspozita u shty për shkak të kufizimeve të udhëtimeve dhe të ndërtimeve që erdhën si rrjedhojë e pandemisë COVID-19, por ajo e ka kompensuar këtë shtyrje pasi ka shfaqur shumë struktura magjepsëse.
Kjo ekspozitë shtrihet në një hapësirë prej 438 hektarësh, midis Dubait dhe Abu Dhabit. Ajo ka ekspozuar disa struktura të jashtëzakonshme të arkitektëve, dizenjuesve dhe artistëve nga e gjithë bota.
Megjithëse ka një gamë të madhe dizajnesh të admirueshme, të gjitha ato bashkohen nën një mesazh, që ishte dhe tema e ekspozitës: “lidhja e mendjeve, krijimi i së ardhmes”.
Disa paviljone – si për shembull Paviljoni i Qëndrueshmërisë nga studio arkitekturore Grimshaw – i dedikohen një ideje të vetme me të cilën po përballet e gjithë bota. Disa struktura të tjera shërbejnë për të kujtuar kontributet unike në shoqëri nga vende të ndryshme.
Paviljoni i Qëndrueshmërisë
Paviljoni i Qëndrueshmërisë nga studio arkitekturore Grimshaw u projektua si një investim afatgjatë që do të qëndrojë edhe pas përfundimit të Dubai Expo 2020. E titulluar zyrtarisht si Terra, kjo strukturë përbëhet nga një “pemë energjie” masive, 135 metra e gjerë.
Dizajni i pemës së energjisë është frymëzuar nga pema e gjakut të dragoit (“Socotra dragon tree”). Çatia rrethore mbështetet nga një kolonë qendrore që ngrihet pa rënë në sy, pasi fillimisht shërben si një strukturë më vete, e cila më pas shndërrohet në çati. Ndërtesa kryesore e paviljonit është e rrethuar nga pemë më të vogla që filtrojnë ujin dhe i japin mundësi këtij kompleksi të gjenerojë me sukses të gjithë energjinë elektrike dhe ujin e nevojshëm për funksionimin e tij.
Në pjesën e brendshme të kësaj ndërtese, vizitorët mund të shijojnë një hapësirë prej 6,000 metrash, të projektuar nga Thinc me zona të shumta ekspozitash, që do të shërbejnë si një muze mbi shkencën dhe qëndrueshmërinë pas përfundimit të Dubai Expo 2020.
Paviljoni i Polonisë
Paviljoni i Polonisë, i projektuar nga WXCA dhe Bellprat Partner, është pjesërisht ndërtesë, pjesërisht vepër arti. Disa skulptura delikate kinetike duket sikur dalin nga një ndërtesë modulare prej druri në Distriktin e Lëvizshmërisë. Kjo skulpturë, e cila përfaqëson një tufë zogjsh duke fluturuar, përkujton një lidhje që nuk ishte vënë re më parë midis Polonisë dhe Dubait – migrimin e zogjve.
Paviljoni i Mbretërisë së Bashkuar
Vizitorët në Dubai Expo 2020 mund të kalojnë një kohë të mirë duke qëndruar përballë paviljonit të Mbretërisë së Bashkuar, teksa lexojnë poezitë që shfaqen në këtë strukturë. Paviljoni ka disa të dala të gjata prej druri, me një tekst që ndriҫon pjesën fundore.
I njohur gjithashtu si Paviljoni i Poezive, kjo strukturë ka një algoritëm që përdor fjalë të shkruara nga vizitorët në anglisht dhe arabisht për të gjeneruar poezi të ndryshme. Arkitekti britanik, Es Devlin, thotë se ideja erdhi nga dëshira për të shprehur diversitetin kulturor të Britanisë në kohët e sotme, si dhe për të treguar të ardhmen teknologjike të vendit.
Paviljoni i Rusisë
I vendosur në Distriktin e Lëvizshmërisë të ekspozitës, Paviljoni i Rusisë spikat mes të tjerëve për shkak të tubave shumëngjyrësh të aluminit që rrethojnë të gjithë strukturën. Ndërthurja e ngjyrave simbolizon lëvizjen e shpejtë dhe të pandalshme të ideve dhe të njohurive.
Forma e paviljonit është frymëzuar nga matryoshka – kukullat tradicionale ruse – dhe përmbush nevojën për hije në një vend me klimë të nxehtë. Arkitekti Sergei Tchoban, nëpërmjet formës dhe përzgjedhjes së materialeve, përkujton kulturën e Rusisë dhe kontributet e këtij vendi për të gjithë botën përmes shkencës, krijimtarisë dhe përparimit të përgjithshëm të dijes.
Paviljoni i Emirateve të Bashkuara Arabe
Nëse i keni parasysh punimet e Santiago Calatrava, vepra e tij në Dubai Expo 2020 mund të mos jetë shumë e vështirë për t’u dalluar. Paviljoni futurist i Emirateve të Bashkuara Arabe është një tjetër shembull i stilit simbol të dizajnit të arkitektit.
Ashtu si shumë nga projektet e tjera nga ky arkitekt, struktura është frymëzuar nga fuqia e fluturimit. Santiago Calatrava Architects & Engineers projektuan me shumë detaje veprimet dhe format e një skifteri – shpendi kombëtar i Emirateve të Bashkuara Arabe. Krahët dinamikë përfaqësojnë të ardhmen e arkitekturës, të influencuar kryesisht nga ideja e lëvizshmërisë. Ҫatia e manovrueshme përmirëson më shumë imazhin e këtij skifteri madhështor.
