Prodhimi i energjisë elektrike dhe eksporti u rrit ndjeshëm në tremujorin e parë të vitit 2026, ndërsa importet ranë më shumë se përgjysmë, sipas të dhënave të publikuara nga INSTAT lidhur me bilancin e energjisë.
Prodhimi neto vendas i energjisë elektrike arriti në 3.647 GWh në tre muajt e parë të vitit, nga 2.234 GWh në të njëjtën periudhë të një viti më parë, duke shënuar një rritje prej 63,2%. Rritja u mbështet kryesisht nga hidrocentralet publike dhe ato private e koncesionare, të cilat përfaqësuan mbi 93% të prodhimit vendas. Ndërkohë prodhuesit e tjerë ku kryesisht janë fotovolatikët zunë një peshë prej 7 për qind.
Eksporti bruto i energjisë elektrike, përfshirë shkëmbimet, u rrit në 1.503 GWh, nga 732 GWh në tremujorin e parë të vitit 2025, ose 105,4% më shumë në bazë vjetore. Në të njëjtën kohë, importi bruto ra në 327 GWh, nga 767 GWh, duke reflektuar një tkurrje prej 57,4%.
Bilanci i shkëmbimit të energjisë rezultoi pozitiv në nivelin 1.177 GWh, ndërsa prodhimi vendas mbuloi pjesën më të madhe të kërkesës në vend.
Hidrocentralet publike prodhuan 1.667 GWh gjatë periudhës, me rritje 63% krahasuar me një vit më parë. Prodhimi nga hidrocentralet private dhe koncesionare arriti në 1.726 GWh, ose 66,8% më shumë në terma vjetorë. Ndërkohë, prodhuesit e tjerë të energjisë, ku përfshihen edhe centralet fotovoltaike, prodhuan 254 GWh në tremujorin e parë, nga 176 GWh një vit më parë, duke regjistruar një rritje prej 44%.
Energjia elektrike në dispozicion u rrit me 8,9% krahasuar me tremujorin e parë të vitit 2025, ndërsa përdorimi nga konsumatorët arriti në 1.954 GWh, me rritje 9,1% në bazë vjetore.
Konsumi nga familjarët u rrit me 8,8%, ndërsa konsumi nga bizneset dhe konsumatorët e tjerë jo familjarë u zgjerua me 9,5%. INSTAT raportoi gjithashtu se humbjet në rrjet arritën në 516 GWh, ose 8% më shumë se një vit më parë. Pesha e humbjeve ndaj energjisë në dispozicion ra lehtë në 20,9%, nga 21,1% në tremujorin e parë të vitit 2025. Humbjet në transmetim u rritën me 31,9%, ndërsa ato në shpërndarje u rritën me 5,1%, sipas të dhënave zyrtare.
Postimi ” Bilanci i energjisë, dyfishohen eksportet, fotovoltatikët prodhuan 44% më shumë, rriten humbjet ” eshte marre nga Revista Monitor.
