Binance, platforma më e madhe në botë për shkëmbimin e kriptomonedhave, u godit nga një sulm kibernetik rekord, gjatë të cilit hakerat morën asete me vlerë 6.3 miliardë dollarë. Analistët e shohin Korenë e Veriut si autoren e mundshme të grabitjes, e cila konsiderohet më e madhja e regjistruar ndonjëherë në sektorin e kriptomonedhave dhe që rrezikon të dëmtojë besimin e investitorëve te asetet dixhitale. Pas përhapjes së lajmit, çmimet e kriptomonedhave ranë, ndërsa Binance pezulloi tërheqjet e fondeve dhe njoftoi se do t'i mbulojë humbjet.

Pjesa më e madhe e operacionit u krye brenda rreth 20 minutash, me fillim të enjten vonë. Në një kohë të shkurtër, afërsisht gjysma e aseteve të vjedhura u bllokua nga emetuesit e monedhave të qëndrueshme (stablecoins), mes tyre Tether, Circle dhe World Liberty Financial, kompani kjo e mbështetur nga presidenti amerikan Donald Trump.

Gjurmët të çojnë drejt Phenianit

Dy kompani amerikane të specializuara në analizën e transaksioneve në blockchain, TRM Labs dhe Chainalysis, vunë re ngjashmëri të sulmit me operacione të mëparshme të hakerave të lidhur me Korenë e Veriut. Sipas TRM, sulmuesit arritën të lëshonin urdhra transferimi nga portofolet dixhitale që përdorte Binance drejt portofoleve nën kontrollin e tyre.

Kjo metodë i ngjan grabitjes së vitit 2025 ndaj platformës Bybit, të cilën Byroja Federale e Hetimit (FBI) e SHBA-së ia kishte atribuuar Phenianit. „TRM ia atribuon sulmin njësisë elitare të hakerave të Koresë së Veriut”, theksoi kompania në analizën e publikuar në faqen e saj. Si TRM, ashtu edhe Chainalysis, deklaruan se kanë një nivel të lartë sigurie që përgjegjësia bie mbi Korenë e Veriut.

Autoritetet amerikane dhe ato koreanojugore, si dhe ekspertët e sigurisë kibernetike, pohojnë se prej vitesh Koreja e Veriut përdor njësi kibernetike të lidhura me shtetin për spiunazh, vjedhje financiare dhe sigurimin e të ardhurave. Phenian i ka hedhur poshtë vazhdimisht këto akuza.

Binance: Fondet e përdoruesve janë të sigurta

Binance siguroi klientët se fondet e tyre janë të mbrojtura dhe se po punon me partnerët për të ngrirë një pjesë të aseteve të prekura. Deri tani janë identifikuar rreth 3 miliardë dollarë. Platforma parashikon që shërbimet e tërheqjes së fondeve të rifillojnë brenda 48 orëve, por nuk dha informacion se ç'ndodhi me 3.3 miliardë dollarët e tjerë.

„Paratë tuaja janë të sigurta dhe ne do të mbulojmë çdo humbje”, shkroi në platformën X bashkëdrejtori ekzekutiv i Binance, Richard Teng. „Hetimi ynë nuk ia ka atribuuar përgjegjësinë asnjë individi”, shtoi ai.

„Është sulmi më i madh kibernetik në histori”, – Aravind Srinivasan, GSR.

Tregjet reagojnë me rënie

Lajmi solli një rënie të përgjithshme të çmimeve të kriptomonedhave. Bitcoin zbriti në 76,368 dollarë, niveli më i ulët i gjashtë javëve, ndërsa Ether ra me më shumë se 3%, në 2,178 dollarë, minimumi i dy muajve, përpara se tregjet të gjenin njëfarë stabiliteti. BNB, monedha dixhitale e prezantuar fillimisht si Binance Coin dhe që mund të përdoret për pagesën e komisioneve në Binance, humbi 5% gjatë 24 orëve të fundit, duke zbritur në 709.70 dollarë, sipas të dhënave të CoinGecko.

Pasiguria u përcoll edhe te aksionet e kompanive të listuara në bursë që veprojnë në tregun e kriptomonedhave. Aksionet e Coinbase Global, e cila deklaroi se nuk u prek nga sulmi, ranë me 4.8%, ndërsa ato të Strategy, kompanisë që investon në Bitcoin, humbën pothuajse 6% në tregtimin pas mbylljes së bursave amerikane.

Pika e hyrjes: një laptop i komprometuar

Sipas hetimeve paraprake, sulmi mund të ketë nisur nga laptopi i një prej inxhinierëve të Binance, të cilin hakerat e kishin komprometuar. Kjo u dha atyre mundësinë të depërtonin në një nga sistemet e kompanisë dhe të kryenin tërheqje të paautorizuara.

„Ekipi ynë i sigurisë po gjurmon të gjithë rrugën e sulmit përmes kompjuterit të komprometuar, i cili mund të ketë qenë pika e hyrjes”, njoftoi Binance.

Mark Karpeles, ish-drejtuesi i Mt Gox, platformës me seli në Tokio që falimentoi rreth 12 vjet më parë pas vjedhjes së Bitcoin me vlerë 500 milionë dollarë, vlerësoi se sulmuesit ka gjasa të kenë pasur akses në çelësat privatë të të paktën dy portofoleve dixhitale të Binance.

„Binance duket se i ka shpërndarë asetet e saj në disa sisteme, duke siguruar që një sulm të prekë vetëm një pjesë të tyre. Megjithatë, edhe një sulm i vetëm mund të shkaktojë humbje të mëdha”, tha Karpeles.

Pasoja më të gjera për tregun

Analistët paralajmërojnë se, përtej dëmit të drejtpërdrejtë financiar, incidenti mund të ketë efekte më të gjera për tregun e kriptomonedhave. Ky treg ishte tashmë nën presion nga normat më të larta të interesit në SHBA dhe nga dobësimi i kërkesës së investitorëve për fondet e tregtueshme në bursë (ETF).

„Ngjarja mund të dobësojë më tej gatishmërinë për të marrë rrezik dhe t'i shtyjë investitorët të rivlerësojnë sigurinë e aseteve të mbajtura në platformat e centralizuara të shkëmbimit”, deklaroi Tim Sun, studiues i lartë në HashKey Group, me seli në Hong Kong.

Vjedhja tejkalon fondin e sigurisë

Binance, që u lejon përdoruesve të blejnë, shesin dhe tregtojnë asete dixhitale, numëron 335 milionë përdorues të regjistruar në mbarë botën dhe administronte rreth 162.8 miliardë dollarë asete në ruajtje, sipas raportit vjetor të kompanisë për vitin 2025.

Platforma ka një fond sigurie për përdoruesit me vlerë 1 miliard dollarë, të mbajtur tërësisht në Bitcoin, i krijuar për të mbrojtur asetet e klientëve në rast shkeljesh të sigurisë. Vlera e vjedhjes e tejkalon ndjeshëm këtë shumë. Richard Teng sqaroi se humbjet do të mbulohen nga ky fond dhe nga fondet e vetë kompanisë.

Kush i ngriu fondet

  • Tether njoftoi se ngriu rreth 1.57 miliardë dollarë asete të lidhura me incidentin.
  • Circle bllokoi më shumë se 800 milionë dollarë.
  • World Liberty Financial bashkëpunoi me kompaninë e ruajtjes së aseteve dixhitale BitGo për ngrirjen e fondeve.
  • Ripple, sipas bashkëthemelueses së Binance, Yi He, ngriu rreth 200 milionë dollarë.

Yi He shtoi se u ngrinë gjithashtu 27 milionë dollarë në stablecoins dhe rreth 2 milionë dollarë në tokens të World Liberty Financial.

Një seri vjedhjesh në industri

Ky incident vjen pas një vargu grabitjesh të mëdha në sektorin e kriptomonedhave. Sipas studiuesve të TRM Labs, vitin e kaluar hakerat morën kriptomonedha me vlerë 2.9 miliardë dollarë përmes afro 150 sulmeve. Në shtator, platforma e shkëmbimit Bitget raportoi se nga sistemi i saj ishin vjedhur rreth 350 milionë dollarë në asete dixhitale, një tjetër shembull që tregon sa e cenueshme mbetet kjo industri ndaj sulmeve kibernetike.