Klientët e Binance, platformës më të madhe në botë për shkëmbimin e kriptomonedhave, kanë nxjerrë neto 4.72 miliardë dollarë nga llogaritë e tyre që kur kompania hoqi pezullimin e tërheqjeve të dielën në mëngjes. Kjo ndodhi pas një sulmi kibernetik gjatë të cilit u vodhën 6.3 miliardë dollarë në kriptomonedha, ngjarje që mund të rezultojë grabitja më e madhe financiare në histori. Shifrën e daljeve neto e bëri të ditur një zëdhënës i kompanisë.

Pas sulmit, Binance kishte bllokuar tërheqjet për rreth 48 orë. Sipas FBI-së, sulmi u krye nga Koreja e Veriut.

Dalje të moderuara krahasuar me krizat e mëparshme

Sipas Binance, fondet e tërhequra neto përbëjnë rreth 2.8% të aktiveve që mbahen në platformë. Analistët e konsiderojnë këtë nivel relativisht të moderuar dhe shohin në të një shenjë se besimi i klientëve ka mbetur kryesisht i paprekur.

Për ta vendosur në kontekst, gjatë një jave pas falimentimit të Silicon Valley Bank në vitin 2023, nga monedha e qëndrueshme (stablecoin) USDC e Circle u tërhoqën rreth 7 miliardë dollarë. Edhe vetë Binance kishte regjistruar dalje neto prej rreth 6 miliardë dollarësh brenda 72 orëve pas kolapsit të FTX në dhjetor 2022.

Bashkëdrejtuesja ekzekutive e Binance, Yi He, shkroi të hënën në një postim në X:

“Prioriteti ynë kryesor për momentin është të sigurohemi që mjedisi të jetë i sigurt, pas së cilës përdoruesit mund të tërheqin fondet e tyre dhe Binance mund të rifillojë operacionet”.

Në të gjithë tregun e kriptomonedhave u vu re rritje e vëllimeve të tregtimit, ndërsa investitorët tentonin të kuptonin pasojat e asaj që mund të jetë vjedhja më e madhe e kryer ndonjëherë ndaj një institucioni financiar.

Përshkallëzim i vjedhjeve nga Koreja e Veriut

Sulmi shënon një hap të ri në vjedhjet e kriptomonedhave që i atribuohen Koresë së Veriut. Kompania e analizës së blockchain-it TRM Labs bëri të ditur se hakerët e lidhur me Pheniannin kanë vjedhur deri tani 7.4 miliardë dollarë gjatë vitit 2026.

Binance ka deklaruar se humbjet do t’i përballojë me fondet e veta dhe se ka vënë tashmë në dispozicion 6 miliardë dollarë nga thesari i kompanisë, nga një fond sigurimi dhe nga rezervat e ngritura posaçërisht për raste shkeljesh të sigurisë.

Tim Sun, studiues i lartë në HashKey Group, kompani shërbimesh financiare për aktivet dixhitale me seli në Hong Kong, vlerësoi se situata ende nuk ka dalë jashtë kontrollit.

“Ende nuk ka shkaktuar panik të përhapur apo tërheqje masive dhe të përqendruara të fondeve”,

tha ai. Sipas Sun, shqetësimet për sigurinë ka gjasa të ndikojnë në masën e kapitalit që krijuesit e tregut, institucionet dhe investitorë të tjerë do të jenë të gatshëm të vendosin në kriptomonedha.

Binance, e cila raporton mbi 335 milionë përdorues në mbarë botën dhe një vëllim mesatar ditor tregtimi prej 95 miliardë dollarësh në aktive dixhitale dhe instrumente derivative, u përpoq të qetësonte klientët.

“Pas një rritjeje fillestare, vëllimet e tërheqjeve kanë rënë dhe po stabilizohen”,

deklaroi kompania në X. Një zëdhënës shtoi se në platformë kishin hyrë 2.7 miliardë dollarë fonde.

Shumë përdorues nuk nxitojnë të largohen

Një pjesë e tregtarëve thanë se po i mbajnë llogaritë aktive. Jay Koh, nënpresident i Asia Web3 AI Association, organizatë me seli në Singapor që mbështet teknologjinë blockchain, shpjegoi qëndrimin e tij:

“Nuk do t’i tërhiqja domosdoshmërisht të gjitha fondet nga Binance, sepse platformat e centralizuara të shkëmbimit vazhdojnë të luajnë një rol të rëndësishëm në likuiditetin, tregtimin dhe aksesin në treg”.

Edhe Ryan Tan, përdorues i Binance, tha se nuk ndiente nevojë të nxitonte për të tërhequr fondet. Që nga rënia e FTX katër vjet më parë, ai ka mbajtur vetëm një shumë relativisht të vogël në llogarinë e platformës.

“Pas kolapsit të FTX, vendosa t’i mbaja të gjitha aktivet në portofolin tim dixhital, në vend që t’i lija në platformat e shkëmbimit”,

tha 39-vjeçari.

Bitcoin rikuperohet, stablecoin-et në rënie

Pasi të premten zbriti në nivelin më të ulët të gjashtë javëve, Bitcoin u rimëkëmb gjatë fundjavës dhe të hënën tregtohej rreth 78,000 dollarë. Edhe Ether u ngrit nga niveli më i ulët i dy muajve.

Nga ana tjetër, kapitalizimi i tregut të monedhave të qëndrueshme, që shpesh shërben si tregues i hyrjes ose daljes së parave nga tregjet e kriptomonedhave, ka rënë që nga e premtja. Kjo lë të kuptohet se një pjesë e investitorëve i kanë kaluar fondet në para të gatshme ose në aktive tradicionale.

Binance njoftoi se ka rifilluar tërheqjet e Bitcoin përmes rrjetit Bitcoin, si edhe të Ether dhe disa monedhave të qëndrueshme të lidhura me dollarin përmes rrjetit Ethereum. Megjithatë, faqja e saj e internetit vazhdonte të tregonte se për shumicën e kriptomonedhave tërheqjet mbeteshin pjesërisht të pezulluara. Të hënën, platforma rikthehu edhe mundësinë e tërheqjes së fondeve në dollarë amerikanë.

Investitorët institucionalë më të kujdesshëm

Vjedhja në Binance është më e madhja në një seri sulmesh ndaj kriptomonedhave për të cilat fajësohet Koreja e Veriut. FBI deklaroi të shtunën se përgjegjës për sulmin ishte grupi TraderTraitor, i sponsorizuar nga shteti verikorean. Studiuesit e cilësojnë grupin si shumë të sofistikuar dhe thonë se veprimtaria e tij ndihmon në financimin e programeve të armatimit të vendit.

Sipas analistëve, përmasat dhe rëndësia e sulmit mund të frenojnë interesin e investitorëve institucionalë për kriptomonedhat, mbështetje që shumë investitorë prisnin të ndihmonte në ngritjen e çmimeve.

Ari Redbord, drejtues global i politikave në kompaninë amerikane të analizës së blockchain-it TRM Labs, bëri të ditur se fondet ETF që investojnë drejtpërdrejt në Bitcoin regjistruan të premten dalje kapitali prej 643 milionë dollarësh, tërheqja më e madhe ditore gjatë tetorit, ndërsa u likuiduan pozicione me levë financiare me vlerë mbi 1.3 miliardë dollarë.

“Një sulm kibernetik ndaj një platforme kriptomonedhash është si një grabitje banke me shpejtësinë e internetit, gjë që krijon një profil të paqëndrueshëm rreziku për këdo që është përgjegjës për administrimin e kapitalit të të tjerëve”,

tha Redbord.

Ngrirja e fondeve të vjedhura

Rreth gjysma e fondeve të vjedhura ishin në monedha të qëndrueshme dhe janë ngrirë nga emetuesit e tyre. Mes tyre është Circle, e cila njoftoi të hënën se kishte ngrirë më shumë se 1.1 miliardë dollarë në USDC.

Jonathan Benton, themelues dhe drejtor ekzekutiv i iSanctuary, kompani e specializuar në rikuperimin e aktiveve në kriptomonedha, theksoi se teknologjia për gjurmimin e fondeve të vjedhura ekziston, por vështirësia qëndron në kthimin e këtij informacioni në veprime të shpejta dhe të koordinuara, përpara se aktivet të zhduken.

Benton, ish-drejtues i njësisë së korrupsionit ndërkombëtar në Agjencinë Kombëtare të Krimit të Mbretërisë së Bashkuar, përmblodhi sfidën e sektorit:

“E ardhmja e kriptomonedhave nuk do të përcaktohet nga sasia e parave që hyjnë në treg, por nga niveli i sigurisë së këtyre parave pasi ato të jenë investuar”.