Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit në nivelin 2.5%, duke vlerësuar se politika aktuale monetare mbetet e përshtatshme për të garantuar kthimin e inflacionit drejt objektivit në afatin e mesëm.
Në mbledhjen e zhvilluar sot, Banka e Shqipërisë konstatoi se inflacioni është rritur gjatë tremujorit të dytë të vitit, kryesisht si pasojë e shtrenjtimit të naftës në tregjet ndërkombëtare, ndërsa ekonomia shqiptare ka vijuar të rritet dhe tregjet financiare kanë mbetur të qëndrueshme.
Sipas Guvernatorit Sejko, inflacioni mesatar i çmimeve të konsumit arriti në 2.9% në muajt prill-maj, nga 2.5% në tremujorin e parë. Rritja u ndikua kryesisht nga çmimet e karburanteve, por edhe nga shtrenjtimi i ushqimeve të papërpunuara dhe disa shërbimeve që kanë kosto të lartë energjie. Në të kundërt, inflacioni i qirave shënoi rënie.
Banka e Shqipërisë vlerëson se rritja e inflacionit është në përputhje me pritshmëritë dhe lidhet me efektet direkte dhe indirekte të goditjes së ofertës në tregjet ndërkombëtare. Megjithatë, forcimi i kursit të këmbimit, balanca mes kërkesës dhe ofertës në ekonomi, si edhe pritjet e ankoruara për inflacionin kanë ndihmuar në mbajtjen e inflacionit bazë pranë objektivit.
Ekonomia u rrit me 3.7% në tremujorin e pare
Sipas të dhënave të INSTAT, ekonomia shqiptare u zgjerua me 3.7% në tremujorin e parë të vitit 2026, e mbështetur nga rritja e konsumit familjar, investimeve private dhe eksporteve të mallrave e shërbimeve.
Rritja vazhdoi të udhëhiqej nga sektorët e shërbimeve dhe ndërtimit, ndërsa bujqësia dhe industria mbetën në tkurrje. Banka e Shqipërisë vlerëson se edhe tremujori i dytë ka ndjekur një ecuri të ngjashme.
Edhe tregu i punës vijoi të përmirësohet. Punësimi në sektorin privat jobujqësor u rrit me 2.2%, paga mesatare në këtë sektor u zgjerua me 11.5%, ndërsa papunësia mbeti në 8.4%.
Banka thekson se rritja e shpejtë e pagave dhe punësimit sinjalizon mungesa në tregun e punës, por këto presione ende nuk janë reflektuar plotësisht në inflacion, pasi janë kompensuar pjesërisht nga rritja e produktivitetit dhe ulja e marzheve të fitimit të bizneseve.
Kredia vijon të rritet me ritme të shpejta
Kushtet financiare mbeten stimuluese, ndërsa sektori bankar vazhdon të shfaqë qëndrueshmëri.
Portofoli i kredisë për sektorin privat u rrit me 13.8% në muajin maj, i mbështetur nga kreditimi i investimeve të bizneseve dhe financimi i blerjes së banesave për familjet. Sipas Bankës së Shqipërisë, cilësia e portofolit mbetet e mirë, ndërsa kredia në lekë vijon të fitojë peshë.
Institucioni vlerëson gjithashtu se borxhi publik dhe ai i jashtëm kanë vijuar të bien, ndërsa bilancet financiare të bizneseve dhe familjeve mbeten të shëndosha.
Inflacioni pritet të kalojë përkohësisht objektivin
Në parashikimin e përditësuar, Banka e Shqipërisë pret që inflacioni të ngjitet lehtësisht mbi objektivin në gjysmën e dytë të vitit, si pasojë e goditjes nga çmimet ndërkombëtare të energjisë. Megjithatë, kjo rritje konsiderohet kalimtare dhe inflacioni pritet të rikthehet gradualisht drejt objektivit në afatin e mesëm.
Nga ana tjetër, ekonomia shqiptare pritet të vijojë të rritet me ritme solide dhe pranë potencialit të saj gjatë viteve në vijim.
Megjithatë, Banka paralajmëron se pasiguritë mbeten të larta dhe varen nga zhvillimet gjeopolitike dhe ecuria e çmimeve të naftës. Për këtë arsye, balanca e rreziqeve mbetet në kahun e sipërm për inflacionin dhe në kahun e poshtëm për rritjen ekonomike.
Normat e interesit mbeten të pandryshuara
Këshilli Mbikëqyrës vendosi të mbajë normën bazë të interesit në 2.5%, të mbajë normën e depozitës njëditore në 1.5% dhe të mbajë normën e kredisë njëditore në 3.5%.
Banka e Shqipërisë thekson se do të vijojë të monitorojë me kujdes zhvillimet ekonomike dhe është e gatshme të reagojë, nëse do të jetë e nevojshme, për të garantuar stabilitetin e çmimeve dhe për të shmangur që goditja aktuale e ofertës të shndërrohet në presione të qëndrueshme inflacioniste.
Postimi ” BSH mban të pandryshuar normën bazë në 2.5%, inflacioni pritet të ngjitet përkohësisht mbi objektiv ” eshte marre nga Revista Monitor.
