Arsimi i lartë do të jetë zëri me rritjen më të madhe në vlerë në buxhetin e Ministrisë së Arsimit për vitin 2027, me një shtesë prej 1,25 miliardë lekësh. Këtë e bëri të ditur ministrja e Arsimit, Mirela Kumbaro, gjatë prezantimit të projektbuxhetit në Komisionin për Edukimin, Shkencën dhe Sportet, ku theksoi se mbështetja e studentëve mbetet prioritet.

Sipas ministres, pjesa më e madhe e fondeve shtesë shkon për paketën e mbështetjes studentore, duke rritur ndihmën direkte për studentët me nevoja sociale.

"Arsimi i lartë merr rritjen më të madhe në vlerë në buxhetin e vitit 2027 të Ministrisë së Arsimit, me shtesë +1,25 miliard lekë më shumë, kryesisht për paketën e mbështjetjes studentore, ku shtojmë mbështetjen direkte për studentët me nevoja sociale, rrisim bursat që ata marrin duke shtuar edhe një bonus qiraje ose një shtese brenda pagesës së përmuajshme që janë të lirë ta përdorin për çfarë kanë më së shumti nevojë, nga 10 000 lekë të reja në muaj në 25 000 lekë të reja në muaj"

Bursat dhe ciklin Master

Kumbaro theksoi se buxheti i ri forcon mbështetjen për studentët, me bursa që arrijnë deri në 25 mijë lekë në muaj. Për herë të parë, skema e mbështetjes për studentët në degët prioritare shtrihet edhe në ciklin e dytë, në programet Master. Njëkohësisht rritet edhe financimi për përmirësimin e kushteve të akomodimit në konviktet universitare.

Bursa për studentët nga familjet në nevojë rritet nga 10.000 në 25.000 lekë në muaj, rreth 275 euro, dhe për herë të parë do të vijojë edhe gjatë studimeve Master. Paketa mbështet mbi 11.500 studentë, të ndarë në tri kategori:

  • 5.900 studentë nga familjet në nevojë përfitojnë 25.000 lekë në muaj;

  • 5.500 studentë me notë mesatare 9–10 përfitojnë 10.000 lekë;

  • 177 studentë të programeve me përparësi kombëtare përfitojnë 50.000 lekë në muaj.

Ministrja e cilësoi si ndryshim thelbësor faktin që skema e mbështetjes financiare për studentët e programeve prioritare zgjerohet tashmë edhe në nivelin Master.

Fonde për akomodimin në konvikte

Projektbuxheti parashikon gjithashtu grante në vlerën 375 milionë lekë për akomodimin e studentëve në "Shoqëritë e Trajtimit të Studentëve" në Tiranë dhe në qytete të tjera universitare. Nga këto fonde pritet të përfitojnë 7 mijë deri në 7.500 studentë.

Duke përfshirë edhe të ardhurat nga tarifat dhe kontributet e pushtetit vendor, financimi total për akomodimin studentor arrin në rreth 900 milionë lekë në vit. Qëllimi i këtyre fondeve është përmirësimi i kushteve të jetesës në rezidencat studentore të Tiranës, Kamzës dhe qyteteve të tjera universitare.