Ledina Elezi/
Së shpejti, Agjencia Kombëtare e Burimeve Natyrore (AKBN) nuk do të monitorojë vetëm kontratat koncesionare për hidrocentralet, por gjithashtu edhe kontratat koncensionare ose jo objekt koncensioni për të gjitha centralet prodhuese me burime të rinovueshme, pra edhe ato që prodhojnë energji nga dielli apo era. Ajo do të ushtrojë detyrat e agjencisë përgjegjëse për energjinë e rinovueshme.
Ky është një nga ndryshimet e reja që po i bëhen vendimit të vitit 2006 për krijimin e Agjencisë Kombëtare të Burimeve Natyrore. Megjithatë, ashtu si më parë, monitorimi i prodhimit të energjisë elektrike do të vazhdojë të kryhet çdo 5 vjet dhe, për efekt penaliteti, vlerësimi do t’i referohet mesatares së prodhimit të energjisë, duke filluar nga viti i parë i plotë financiar i vënies në punë të të gjitha centraleve prodhuese me burime të rinovueshme.
Tashmë AKBN-ja do të lëshojë certifikatat vjetore të monitorimit për centralet prodhuese nga burime të rinovueshme, sipas tarifave të përcaktuara në dy anekse të reja që do t’i shtohen vendimit.
Kjo agjenci nuk do të ndjekë më procesin e vlerësimit të investimeve të kryera për projektet e ndërtimit të kapaciteteve prodhuese të energjisë elektrike, por do të hartojë raportet e vlerësimit të impianteve me burime të rinovueshme dhe hidrocentraleve objekt koncesioni ose jo objekt koncesioni.
AKBN-s i lind e drejta të vendosë gjoba ndaj shoqërive për mospërmbushje të detyrimeve kontraktuale ose përndryshe të njoftojë direkt organet shtetërore përgjegjëse, në rast se konstatohen shkelje të dispozitave ligjore.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
