Drejtoria e Përgjithshme e Doganave ka konstatuar mungesën e 69.5 tonëve kafe në një magazinë fiskale në qarkun e Durrësit, ku për operatorin ekonomik janë llogaritur detyrime akcize dhe penalitete me vlerë totale 17.8 milionë lekë.
Kontrolli u krye nga strukturat e Drejtorisë së Kontrolleve të Akcizës, pranë Departamentit të Akcizës, mbi bazën e kritereve të riskut dhe në zbatim të detyrimeve që rrjedhin nga Ligji nr. 61/2012 “Për akcizat në Republikën e Shqipërisë”, i ndryshuar. Magazina funksiononte me pezullim të detyrimeve të akcizës dhe kishte autorizim për prodhimin dhe përpunimin e kafes, produkt që i nënshtrohet akcizës.
Detyrimet dhe penalitetet
- Detyrime akcize të papaguara: 4.5 milionë lekë
- Penalitete të llogaritura: 13.3 milionë lekë
- Totali i detyrimeve dhe penaliteteve: 17.8 milionë lekë
Sipas Administratës Doganore, strukturat përgjegjëse do të vazhdojnë procedurat administrative përkatëse për këtë rast, në përputhje me legjislacionin në fuqi.
Kontrollet vijojnë
Doganat bëjnë të ditur se kontrollet ndaj operatorëve ekonomikë do të vazhdojnë, me qëllim garantimin e zbatimit të legjislacionit të akcizës dhe mbrojtjen e interesave financiare të shtetit. Institucioni thekson se është i angazhuar në forcimin e kontrolleve dhe zbatimin e ligjshmërisë, duke synuar parandalimin dhe evidentimin e shkeljeve, luftën kundër evazionit fiskal, ruajtjen e konkurrencës së ndershme dhe mbrojtjen e të ardhurave të buxhetit të shtetit.
