Një ditë më parë ishte larguar duarbosh. Pas rreth një gjysmë ore pritje i kishin thënë se paratë kishin mbaruar. Sot Rabie Jusufaj nga Sauku i Tiranës arriti të marrë pa shumë vonesë pensionin dhe shpërblimin e fundvitit. Megjithëse buzëqeshja në fytyrë tregon të kundërtën, 63-vjeçarja nuk është fort e kënaqur.
“Na kishin thënë se invalidët do të merrnin nga 110 mijë lekë shpërblim, por mora më pak se 30 mijë lekë. Prandaj po habitem.”
Ashtu si Rabija, edhe Bajrami e ka për të dytën ditë që vjen në postë. Edhe për të e sotmja rezultoi me sukses.
“Dje erdha, më thanë që nuk kishte lekë. Më thanë hajde në orën 1, por nuk e erdha dot. Sot i mora edhe pensionin, bashkë me shpërblimin”.
Teksa në njërën dorë mban kartëmonedhat e në tjetrën qindarkat, Teuta na tregon se si do i shpenzojë paratë e pensionit dhe shpërblimit.
“Po më thotë edhe kjo mbesa që sa lek more. Kjo nuk e kupton që t’ia shpjegoj unë. Unë do i marr këto e do paguaj ujë e drita. Për Vit të Ri të na mbajë Zoti mirë. Gjel deti jo, bakllava edhe ndoshta pasi ka më pak shpenzime”.
Midis të bërit ekonomi dhe festimeve tradicionale, me tryezën më të varfër, festat e fundvitit kanë gjetur shumë shqiptarë të tjerë.
Krahasuar me një vit më parë tavolina e fundvitit është shtrenjtuar ndjeshëm. Gjeli i detit është rritur me rreth 50 për qind, bakllavaja me 30 për qind, ndërsa sallatat dhe pijet, përafërsisht me 20 dhe 25 për qind.
Ndërkohë qeveria vendosi më herët të shpërblejmë me 5 mijë lekë pensionistët, me 6 mijë lekë ata që marrin pagesën e invaliditetit, dhe nga 3 mijë lekë familjet me ndihmë ekonomike dhe personat me aftësi të kufizuar.
Burimi: A2 CNN
