Google, shoqëria e grupit Alphabet, deklaroi të premten se ka ndryshuar politikën e saj të spam-it në Europë për t’iu përgjigjur shqetësimeve të BE-së që mund të kishin rezultuar në një sanksion antitrust.
Kolosi amerikan i teknologjisë u gjend në shënjestrën e autoriteteve rregullatore të BE-së pasi disa editorë u ankuan për politikën e tij të abuzimit të reputacionit të site-ve.
Kjo politikë synon të luftojë praktikën e publikimit të faqeve të palëve të treta në një sit, në përpjekjen për të manipuluar rezultatet e kërkimit duke shfrytëzuar kriteret e renditjes së faqes pritëse, e njohur zakonisht si «SEO parazit».
BE deklaroi se monitorimi i saj tregoi se politika e spam-it të Google penalizonte faqet e mediave dhe përmbajtjet e mediave dhe të editorëve të tjerë në rezultatet e kërkimit në Google, kur të tilla site përfshinin përmbajtje që vinin nga partnerë tregtarë.
Google deklaroi se, duke nisur nga 30 gushti, çdo veprim manual për të penalizuar faqet nuk do të zbatohet te përdoruesit e 27 vendeve të BE-së, në Islandë, Norvegji dhe Lihtenshtajn (Hapësira Ekonomike Europiane).
Politika nuk do të pësojë ndryshime jashtë Hapësirës Ekonomike Europiane – shtoi kompania.
«Ne e mirëpresim shfuqizimin e kësaj politike, e cila penalizonte në mënyrë të padrejtë editorët dhe përdoruesit e tjerë të biznesit të Google Search» deklaroi zëdhënësi i Komisionit Europian, Thomas Regnier.
Shqetësimet në lidhje me këtë politikë e kishin nxitur Komisionin Europian, i cili vepron si autoriteti garantues i konkurrecës në BE, të hapte një hetim në kuadër të Aktit për Tregjet Digjitale (Digital Markets Act – DMA), i cili synon të kufizojë fuqinë e Big Tech.
«Falë DMA, Google Search nuk do t’i penalizojë më faqet e lajmeve vetëm sepse kanë përmbajtje të palëve të treta» – deklaroi Regnier.
Komisioni Europian do të vëzhgojë tashmë zbatimin e politikës së re për t’u siguruar që është në përputhje me DMA.
Shkeljet e DMA mund t’u kushtojnë kompanive gjoba deri në 10% të xhiros së tyre vjetore globale.
/ Reuters
Postimi ” Google ndryshon politikën e spam në BE për të shmangur sanksionin antitrust ” eshte marre nga Revista Monitor.
