Greqia po zbaton stimuj të drejtpërdrejtë financiarë për të rikthyer banorët në territoret që po përballen me rënie demografike. Ministria e Kohezionit Social dhe Familjes ka njoftuar se më 14 tetor do të çelë dyert platforma e zgjeruar e skemës së zhvendosjes, e cila parashikon një fond prej 10 mijë eurosh për qytetarët që vendosin të transferojnë përgjithmonë qendrën e tyre të jetës në rajone specifike.

Sipas ministres Domna Michailidou, risia kryesore e këtij edicioni është mundësia që 50 për qind e shumës totale të tërhiqet paraprakisht, përpara se procesi i zhvendosjes të ketë përfunduar zyrtarisht, me qëllim lehtësimin e shpenzimeve fillestare për familjet dhe individët.

Programi e ka zanafillën në rajonin e Evrosit, një nga zonat kufitare më të goditura nga tkurrja e popullsisë. Në fazën e parë, mbështetja ishte 10 mijë euro për fshatrat me më pak se 500 banorë, ndërsa për vendbanimet më të mëdha pagesa niste nga 6 mijë euro, plus 1 mijë euro për çdo fëmijë të mitur deri në tavanin prej 10 mijë eurosh. Tashmë, skema po pëson një zgjerim të ndjeshëm kombëtar.

Pas Evrosit, nisma do të shtrihet në disa qarqe të tjera si Kilkis, Florina, Kastoria, Drama, Pella, Grevena, Kozani, Serres, Ioannina dhe Thesprotia. Në këtë fazë të re, qeveria synon të unifikojë shumën e grantit në 10 mijë euro për të gjithë përfituesit, duke përfshirë edhe qendrat urbane të qarqeve që regjistrojnë rënie të popullsisë.

Gjithashtu, rrethi i përfituesve është zgjeruar. Përveç qytetarëve që jetojnë aktualisht brenda vendit, programi u drejtohet edhe grekëve të diasporës që duan të rikthehen, punonjësve në distancë, pensionistëve dhe të diplomuarve të rinj. Kushtet e aplikimit janë lehtësuar ndjeshëm, pasi nuk kërkohet më që aplikanti të dëshmojë se është i punësuar në zonën ku zhvendoset; mjafton disponimi ose marrëgja e një banese dhe transferimi real i vendbanimit.

Përfituesit nuk i nënshtrohen kritereve të të ardhurave apo kufizimeve të moshës, por detyrohen të rezidojnë në zonën e re për të paktën tre vjet. Zgjerimi i njoftuar shënon kalimin e Greqisë drejt një modeli më agresiv kundër shpopullimit të rajoneve periferike.