Inflacioni në Shtetet e Bashkuara doli më i lartë se sa prisnin analistët në tetor, duke e vënë Rezervën Federale para presionit për të vazhduar me rritjen e normave të interesit. Sipas të dhënave të publikuara të martën nga Departamenti amerikan i Punës, indeksi i çmimeve të konsumit u rrit me 0.4% në krahasim me shtatorin, ndërkohë që ekonomistët parashikonin një rritje mujore prej 0.3%. Në shtator, rritja mujore kishte qenë 0.6%.

Edhe inflacioni bazë, i cili nuk përfshin çmimet e ushqimeve dhe të energjisë për shkak të luhatjeve të tyre, u rrit me 0.3%, mbi parashikimin prej 0.2%. Ky tregues mbeti në të njëjtin nivel me atë të muajit paraardhës. Të dhënat tregojnë se presionet mbi çmimet vazhdojnë të jenë të forta, edhe pse ritmi mujor i inflacionit është ngadalësuar.

Pa normë vjetore për tetorin

Këtë herë, autoritetet amerikane nuk publikuan normën vjetore të inflacionit për tetorin, ndryshe nga praktika e zakonshme. Arsyeja është mbyllja e administratës federale gjatë tetorit 2025, e cila pengoi mbledhjen e të dhënave për çmimet dhe la pa bazë krahasimi llogaritjen e ndryshimit vjetor.

Në shtator 2026, inflacioni vjetor kishte arritur në 3.7%, ndërsa inflacioni bazë ishte 2.6%, në të dy rastet mbi objektivin afatgjatë prej 2% që ka Rezerva Federale.

Energjia dhe tarifat, nxitësit kryesorë

Rritja e çmimeve gjatë këtij viti është ushqyer nga shtrenjtimi i energjisë, në kontekstin e konfliktit të SHBA-së dhe Izraelit me Iranin, si dhe nga tarifat mbi importet të vendosura nga administrata e presidentit Donald Trump. Ndonëse çmimet e naftës kanë rënë gjatë ditëve të fundit, kostot e energjisë dhe të ushqimeve vazhdojnë të rëndojnë mbi buxhetet e familjeve amerikane, të cilat përballen me një kosto të lartë jetese.

Reagimi i tregjeve

Publikimi i të dhënave pati efekt të menjëhershëm në tregjet financiare. Aksionet amerikane shënuan rënie, ndërsa yield-et e obligacioneve të Thesarit u rritën, pasi investitorët rishikuan pritjet për politikën monetare.

Në mbledhjen e tetorit, Rezerva Federale e la të pandryshuar normën bazë të interesit në intervalin 3.75–4%. Pas publikimit të inflacionit, tregjet financiare përfshinë plotësisht në çmime një rritje tjetër të normës me 0.25 pikë përqindjeje në dhjetor.

Sfida e Fed-it

Banka qendrore amerikane ndodhet para detyrës së vështirë për të frenuar inflacionin, në një kohë kur ekonomia vazhdon të rritet dhe tregu i punës mbetet relativisht i qëndrueshëm. Të dhënat e reja vijnë edhe në një moment kur kostoja e jetesës është shndërruar në një nga shqetësimet kryesore të votuesve amerikanë, pas zgjedhjeve të fundit për Kongresin.

Vendimi i radhës i Rezervës Federale për normat e interesit pritet në dhjetor, ndërsa publikimi i ardhshëm i të dhënave për inflacionin është parashikuar për 10 dhjetor.