Sipas të dhënave të publikuara të mërkurën nga shoqëria e konsulencës Benchmark Mineral Intelligence, në prill, kërkesa globale për makina elektrike u rrit për muajin e dytë radhazi, pasi çmimet e larta të benzinës i mbajtën blerësit larg makinave me motor me djegie të brendshme.
Regjistrimet e makinave të reja elektrike me bateri dhe makinave elektrike hibride plug-in u rritën me 6% krahasuar me një vit më parë, duke arritur 1.6 milionë në prill, një tregues i shitjeve, megjithëse u tkurrën me 9% nga niveli rekord mujor i marsit, tha BMI.
“Kërkesa vijon të mbështetet nga lehtësitë e politikave, nga rritja e çmimeve të benzinës dhe nga rritja e pranisë së prodhuesve kinezë të pajisjeve origjinale (OEM)” – deklaroi BMI.
Qeveritë kanë mbajtur në fuqi masa për të kufizuar çmimet e karburantit pasi lufta në Lindjen e Mesme ndërpreu një rrugë kryesore transporti të naftës.
Në Europë, regjistrimet u rritën me 27% në rreth 400.000 njësi në prill, ndërsa vendet në Zonën Ekonomike Europiane (EEA) dhe Zvicra kanë dhënë gati 200 miliardë euro (235 miliardë dollarë) për ekosistemin e tyre të automjeteve elektrike, tregoi një studim i kohëve të fundit.
Megjithatë, situata globale ishte e pabarabartë.
Në Kinë, regjistrimet në prill ranë me 8% krahasuar me vitin e kaluar, në afërsisht 850,000 automjete, pasi u hoq mbështetja për shkëmbimin e automjeteve dhe lehtësimi tatimor për blerjet e automjeteve elektrike përfundoi
Megjithatë, prodhuesit kinezë zgjeruan praninë e tyre jashtë vendit, me eksportet që tejkaluan 400,000 automjete elektrike vetëm në prill dhe eksportet totale të automjeteve arritën thuajse 1.4 milionë njësi në katër muajt e parë të vitit 2026, më shumë se dyfishi i një viti më parë.
Në Amerikën e Veriut, regjistrimet ranë me 28% në 120,000 njësi në prill.
Meksika u dallua, ku shitjet u rritën thuajse 50% këtë vit, ndërsa rënia prej 7% e Kanadasë pritet të përmbyset pas një programi të ri nxitës.
Markat kineze po fitojnë terren gjithashtu në Europë pavarësisht tarifave të Bashkimit Europian:
22% e automjeteve elektrike dhe hibrideve plug-in të shitura në Europë në katër muajt e parë të vitit 2026 u prodhuan në Kinë, në rritje krahasuar me 19% një vit më parë, treguan të dhënat e BMI.
/ Reuters
Postimi ” Kërkesa globale për automjete elektrike rritet për muajin e dytë me radhë ” eshte marre nga Revista Monitor.
