Bashkimi Europian i ka kërkuar TikTok të rishikojë funksionimin e faqes së rekomandimeve “For You”, pasi autoritetet në Bruksel shqetësohen se algoritmi i platformës mund t’i drejtojë përdoruesit, në mënyrë të veçantë fëmijët dhe adoleshentët, drejt konsumimit të pandërprerë të përmbajtjeve potencialisht të dëmshme.

Komisioni Europian ka arritur në një përfundim paraprak se TikTok ka shkelur Aktin e Shërbimeve Digjitale (DSA), me argumentin se sistemi i tij i rekomandimeve mund t’i ekspozojë përdoruesit ndaj përmbajtjeve që dëmtojnë shëndetin mendor.

Efekti “rabbit hole” në qendër të hetimit

Shqetësimi kryesor lidhet me të ashtuquajturin rabbit hole effect, një mekanizëm që i ekspozon përdoruesit ndaj një vargu videosh gjithnjë e më të ngjashme. Si pasojë, ata nxiten të qëndrojnë më gjatë në platformë dhe e kanë gjithnjë e më të vështirë ta ndërpresin përdorimin.

Sipas Komisionit, sa më shumë një përdorues ndërvepron me një lloj të caktuar videosh, aq më shumë përmbajtje të ngjashme i sugjeron algoritmi. Kjo dinamikë bëhet veçanërisht problematike kur videot kanë të bëjnë me trishtimin, izolimin, problemet e shëndetit mendor ose perceptimin e trupit.

Masat e TikTok, të pamjaftueshme për Brukselin

Autoritetet europiane vlerësojnë se hapat e ndërmarrë deri më tani nga kompania nuk mjaftojnë. Madje, edhe kur përdoruesit zgjedhin opsionin “Not interested” (Nuk jam i interesuar), algoritmi mund të vijojë t’u shfaqë përmbajtje të ngjashme.

Për këtë arsye, Brukseli i ka kërkuar platformës që algoritmi t’u japë më shumë peshë preferencave të shprehura drejtpërdrejt nga përdoruesit, në vend të kohës që ata shpenzojnë duke parë videot. Komisioni ka sugjeruar gjithashtu që TikTok t’i bëjë më të lehta për t’u përdorur mekanizmat e kontrollit dhe ta testojë rregullisht algoritmin.

Kompania i kundërshton gjetjet

TikTok i ka hedhur poshtë konstatimet e Komisionit Europian, duke i cilësuar ato thelbësisht të pasakta. Kompania pohon se ka marrë masa për mbrojtjen e përdoruesve dhe se u ofron atyre mundësi për të kontrolluar përmbajtjen që shohin.

Hetimi ndaj platformës ka nisur më shumë se dy vjet më parë. Gjatë vitit 2026, Komisioni Europian ka ngritur edhe shqetësime të tjera, që lidhen me elementet e platformës që mund të krijojnë varësi, si dhe me mbrojtjen e privatësisë së fëmijëve. Nën presionin e autoriteteve europiane është vënë edhe Meta, së cilës i kërkohet të ndryshojë elementet e Facebook dhe Instagram që nxisin përdorimin e tepruar.

Rreziku i gjobave

Nëse shkeljet konfirmohen përfundimisht, TikTok mund të përballet me gjoba që arrijnë deri në 6% të xhiros së tij vjetore globale. Për momentin, bëhet fjalë vetëm për konstatime paraprake dhe kompania ka të drejtë të paraqesë argumentet e saj përpara se të merret një vendim përfundimtar.