Ksamili është përfshirë në renditjen e 20 destinacioneve më të mira në Europë për një mënyrë jetese që nxit jetëgjatësinë, sipas një liste të re të publikuar nga kompania turistike CV Villas. Fshati bregdetar shqiptar zë vendin e 17-të, ndërsa kreun e renditjes e mban Valetta, kryeqyteti i Maltës.
Jetëgjatësia pa trajtime të kushtueshme
Interesi për të jetuar më gjatë është në rritje, por ekspertët theksojnë se kjo nuk lidhet domosdoshmërisht me pajisje apo trajtime të shtrenjta. Në vend të terapive me dritë të kuqe ose suplementeve me kosto të lartë, ata këshillojnë vëmendje ndaj zakoneve të thjeshta të përditshme, si ecja, ushqimi me bazë bimore dhe marrëdhëniet shoqërore.
Shembull për këtë janë banorët e të ashtuquajturave “Zona Blu”, rajone që shquhen për numrin e lartë të njerëzve mbi 100 vjeç. Në Europë njihen dy zona të tilla: Ikaria në Greqi dhe Sardenja në Itali. Megjithatë, edhe shumë destinacione të tjera ndjekin parime të ngjashme, si aktiviteti fizik, ushqimi i thjeshtë dhe lidhjet e forta me komunitetin.
Si u hartua renditja
CV Villas analizoi pothuajse 100 destinacione, duke u mbështetur në disa nga parimet e studimit “Power 9” të Dan Buettner për Zonat Blu. Çdo destinacion u vlerësua me maksimumi 100 pikë, sipas disa kritereve:
- mundësia për të lëvizur në këmbë, e matur përmes ndryshimeve të lartësisë së terrenit;
- ritmi i jetës, i matur me orët mesatare vjetore të punës;
- numri i restoranteve me oferta vegane dhe i kantinave të verës për banor;
- lidhjet komunitare, të vlerësuara përmes numrit të kafeneve dhe kishave për banor.
“Sipas mundësive për të ecur në këmbë, ushqimit të mirë, ndjenjës së komunitetit dhe ritmit më të qetë të jetës, këto destinacione ofrojnë gjithçka që duhet të ketë një pushim çlodhës”, tha Hannah Marshall, menaxhere marketingu në CV Villas.
Sipas saj, edhe pse Europa ka vetëm dy Zona Blu të njohura zyrtarisht, shumë vende të tjera ndjekin një stil të ngjashëm jetese.
Malta dominon listën
Katër nga 20 destinacionet ndodhen në Maltë. Valetta u vlerësua për mundësinë e lëvizjes në këmbë dhe ambientet e përshtatshme për socializim gjatë vakteve. Në vendin e dytë është ishulli grek Paxos, i njohur për komunitetin e lidhur ngushtë, ritmin e qetë dhe natyrën e paprekur. I treti renditet Saint-Tropez në Francë, ndërsa i katërti Eger në Hungari, qytet historik që dallohet për traditën e konsumit të moderuar të verës dhe takimet shoqërore gjatë darkave, zakone që lidhen me jetëgjatësinë.
Renditja e plotë
- Valetta, Maltë
- Paxos, Greqi
- Saint-Tropez, Francë
- Eger, Hungari
- Mdina, Maltë
- Ibiza, Spanjë
- Taormina, Itali
- Lefkada, Greqi
- Budva, Mali i Zi
- Dingle, Irlandë
- Nessebar, Bullgari
- Bad Ischl, Austri
- Piran, Slloveni
- Ålesund, Norvegji
- St. Julian’s, Maltë
- Gozo, Maltë
- Ksamil, Shqipëri
- Levoča, Sllovaki
- Bordeaux, Francë
- Novi Sad, Serbi
