Turizmi po e ndryshon profilin e blerësve në tregun shqiptar të veshjeve dhe ndikimi i tij nuk kufizohet më vetëm te muajt e verës. Kështu e sheh situatën Mehmet Memo, menaxher i LC Waikiki për Shqipërinë dhe Maqedoninë e Veriut, i cili thotë se blerësit nga vendet europiane po shtohen në çdo periudhë të vitit. Sipas tij, gjatë sezonit veror turistët zënë rreth 25% të shitjeve të markës, ndërsa kërkesa e përgjithshme është rritur me rreth 6% krahasuar me të njëjtën periudhë të vitit të kaluar.

Ndër turistët që blejnë më shumë në dyqanet e kompanisë janë ata nga Italia, Kosova, Mbretëria e Bashkuar, Gjermania dhe Polonia, si dhe nga vende të tjera të rajonit dhe të Europës. Në të njëjtën kohë, konsumatori vendas është bërë më i kujdesshëm dhe kërkon më shumë vlerë për paratë që shpenzon.

Kërkesë e qëndrueshme, rritje rreth 6%

Memo e përshkruan kërkesën për produktet e LC Waikiki si pozitive dhe të qëndrueshme. Rritja prej rreth 6% në krahasim me një vit më parë, sipas tij, vjen si nga blerësit vendas, ashtu edhe nga numri në rritje i turistëve. Menaxheri vëren se konsumatori sot shpenzon me më shumë maturi, por njëkohësisht pret më shumë nga çdo blerje.

Pikërisht kjo sjellje e konsumatorit, sipas tij, e mban konkurrues modelin e LC Waikiki, i cili ndërthur modën, cilësinë dhe çmimin e përballueshëm. Ky kombinim, thotë Memo, i jep markës një pozicion të fortë në një treg ku blerësi peshon me kujdes çdo shpenzim.

Çfarë blihet më shumë dhe kush blen

Kërkesa nuk përqendrohet vetëm në një kategori, por shpërndahet në disa segmente. Veshjet casual dhe ato sezonale renditen ndër më të kërkuarat. Sa i përket profilit të blerësve, gratë dhe të rinjtë janë ndër konsumatorët më aktivë, ndërsa veshjet për fëmijë vazhdojnë të kenë peshë të rëndësishme në shitje.

Memo thekson se avantazhi i kompanisë qëndron në faktin që LC Waikiki është një markë e dedikuar për të gjithë familjen. Kjo, sipas tij, i lejon kompanisë të ketë një bazë të gjerë konsumatorësh dhe të mos varet vetëm nga një grupmoshë apo nga një kategori e vetme produktesh.

Konsumatori shqiptar, më përzgjedhës

Një nga ndryshimet më të dukshme në sjelljen e blerësve vendas është rritja e përzgjedhjes. Sipas Memos, konsumatori shqiptar sot krahason më shumë çmimet, cilësinë dhe vetë produktin para se të vendosë të blejë. Ai nuk kërkon domosdoshmërisht artikullin më të lirë, por vlerën më të mirë për paratë që paguan.

Për t'iu përgjigjur këtyre zakoneve të reja, kompania ka zgjeruar praninë e saj në kanalin online. Këtë verë, LC Waikiki prezantoi në Shqipëri dhe në Maqedoninë e Veriut shërbimin e tregtisë elektronike përmes faqes së internetit dhe aplikacionit për celularë. Memo e cilëson këtë si një hap që i përgjigjet mënyrës së re të konsumit dhe që i jep klientit më shumë fleksibilitet për të zgjedhur ku dhe kur të blejë.

Sipas tij, lançimi i e-commerce është një moment i rëndësishëm në zhvillimin e markës në Shqipëri, pasi synimi është që blerësi të ketë të njëjtën eksperiencë dhe të njëjtën gamë zgjedhjesh, pavarësisht nëse blen në dyqan apo online.

Turizmi, më shumë se një faktor sezonal

Memo pohon se turizmi ndikon drejtpërdrejt në ecurinë e tregtisë me pakicë dhe se ky efekt është parë qartë edhe te LC Waikiki. Pesha prej rreth 25% e shitjeve që vjen nga turistët gjatë verës është edhe më e lartë në dyqanet e zonave turistike, si dhe në ato të qendrave tregtare në kryeqytet.

Për ne, turizmi nuk është vetëm një faktor sezonal. Ai po sjell konsumatorë të rinj nga tregje të ndryshme, duke rritur ekspozimin e markës dhe duke krijuar mundësi të reja për rritje.

Lidhur me preferencat e vizitorëve të huaj, Memo thotë se ato nuk ndryshojnë shumë nga ato të blerësve shqiptarë. Edhe turistët kërkojnë kryesisht veshje casual, praktike dhe sezonale. Dallimi kryesor është se, gjatë pushimeve, turisti priret më shumë të blejë produkte që mund t'i përdorë menjëherë.

Qytetet turistike kundrejt Tiranës

Ndikimi i turistëve është dukshëm më i madh në qytetet turistike, veçanërisht në muajt e verës. Atje, sipas Memos, sezonaliteti është më i theksuar dhe kërkesa përqendrohet më shumë te produktet verore dhe praktike.

Tirana, nga ana tjetër, paraqitet si një treg më i qëndrueshëm gjatë gjithë vitit, ku shtylla kryesore mbetet konsumatori vendas. Megjithatë, menaxheri shton se edhe kryeqyteti po përfiton gjithnjë e më shumë nga rritja e flukseve turistike.

Konkurrenca dhe strategjia omnichannel

Tregu shqiptar i veshjeve ka parë vitet e fundit zgjerimin e markave të tjera ndërkombëtare me çmime ekonomike. Memo pranon se konkurrenca është rritur, por e sheh këtë si zhvillim pozitiv për tregun, pasi i jep konsumatorit më shumë zgjedhje dhe e detyron kompaninë të përmirësohet vazhdimisht.

Në këtë kuadër, zhvillimi i kanalit online është pjesë e strategjisë së kompanisë. Pas lançimit të e-commerce në Shqipëri dhe në Maqedoninë e Veriut, klientët mund të blejnë produktet e LC Waikiki si në dyqan, ashtu edhe përmes faqes së internetit dhe aplikacionit, kudo dhe në çdo kohë. Sipas Memos, e ardhmja e tregtisë me pakicë qëndron pikërisht në kombinimin e këtyre kanaleve dhe në një eksperiencë sa më të unifikuar për blerësin.

Sezoni i vjeshtës dhe çmimet

Me nisjen e shitjeve për sezonin e vjeshtës, kompania do të sjellë koleksione të reja dhe një ofertë të përshtatur me tendencat dhe nevojat e konsumatorit. Për sa u përket çmimeve, Memo nuk paralajmëron ndryshime konkrete, por thekson se synimi është ruajtja e një raporti sa më të mirë mes çmimit dhe cilësisë.

Ai nënvizon se kujdesi më i madh i konsumatorit në shpenzime e bën edhe më të rëndësishme që çdo blerje të ketë vlerë për të. Sipas tij, kjo është filozofia që LC Waikiki do të vazhdojë të ndjekë: modë e aksesueshme dhe cilësi e besueshme për të gjithë familjen, në përputhje me moton e markës “Të gjithë meritojnë të vishen mire.”