Maqedonia e Veriut ka nisur zyrtarisht ndërtimin e një segmenti të ri autostrade prej 12 kilometrash, i cili lidh zonën e Bukojçanit me Kërçovën. Ky projekt infrastrukturor, me një vlerë totale prej 139 milionë eurosh, ka për qëllim përmirësimin e infrastrukturës rrugore dhe lehtësimin e qarkullimit të njerëzve dhe mallrave në këtë zonë të vendit.
Sipas planit teknik, autostrada e re do të ndërtohet me nga dy korsi për secilin drejtim lëvizjeje, ndërsa shpejtësia e projektuar do të lëvizë nga 110 deri në 130 kilometra në orë. Zbatimi i punimeve në terren është parashikuar të zgjasë gjithsej katër vjet.
Struktura e financimit përfshin një kredi prej 119 milionë eurosh siguruar nga Banka Evropiane për Rindërtim dhe Zhvillim, si dhe një grant prej 20 milionë eurosh të vënë në dispozicion nga Bashkimi Evropian. Gjithashtu, projekti përffiton mbështetje shtesë përmes një granti prej 300 mijë eurosh shpërndarë nëpërmjet Kornizës së Investimeve për Ballkanin Perëndimor.
Ky segment përbën një pjesë kyçe të Korridorit VIII, i cili përfaqëson një lidhje strategjike transporti me synimin për të bashkuar portin e Durrësit në Shqipëri me portin e Varnës në Bullgari. Përfundimi i këtij aksi pritet të nxisë lidhjet rajonale, të lehtësojë transportin midis vendeve të Ballkanit dhe të shkurtojë ndjeshëm kohën e udhëtimit, duke rritur sigurinë dhe zhvillimin ekonomik.
