Fondi Shqiptar i Zhvillimit ka hapur tenderin me vlerë 208.3 mln lekë, për ndërhyrje në disa ura të vendit.
Sipas dokumenteve të tenderit, projekti parashikon ndërtimin e disa urave, me qëllim përmirësimin e qarkullimit të automjeteve në disa prej akseve rrugore, teksa FSHZH argumenton se ky projekt është bazuar në kërkesat e Njësive të Qeverisjes Vendore, si dhe nga vlerësimi në terren për domosdoshmërine e ndërtimit apo rindërtimit të tyre.
Kjo, duke marrë në konsideratë se në disa raste urat ekzistuese janë të degraduara dhe përbëjnë rrezik për shfrytëzimin e tyre, ndërsa në disa raste të tjera nuk ekzistojnë fare, ndërkohë që janë të domosdoshme për lidhjen e akseve rrugore.
Në këtë fazë të projektit, FSHZH nuk ka bërë me dije se cilat do të jenë projektet konkrete që do të financohen, pasi objektet do të bazohen në kërkesat e bashkive dhe vlerësimin tekniko – financiar që do të bëjë stafi i këtij dikasteri ku do të bëhet një listë sipas prioriteve në gjithë territorin e Shqipërisë.
Zbatimi i këtyre projekteve ka si qëllim të përmirësojë qarkullimin e automjeteve, njerëzve dhe të rrisë sigurinë e lëvizjes. Në dokumentet e tenderit specifikohet se përveç ndërtimit të urave, parashikohet të ndërtohen edhe lidhjet me rrugët në dy anët e saj.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
