Metodologjia e Eurostat referoi një vlerë më të lartë të inflacionit në muajin shkurt 2025 në raport me matjet kombëtare të INSTAT.
Indeksi i Harmonizuar i Çmimeve rezultoi në shkurt 2.4 për qind në shkurt, teksa indeksi i brendshëm i çmimeve të konsumit rezultoi 1.9% në të njëjtin muaj. IHCK përfaqëson një indeks të harmonizuar për të matur ndryshimin e çmimeve në të gjitha vendet Europës.
Rritja më e madhe e çmimeve prej 5,9% vërehet në grupin “Argëtim dhe kulturë”, pasuar nga grupet “Pije alkoolike dhe duhan” me 4,1%, “Mobilim, pajisje shtëpie dhe mirëmbajtje” dhe “Hotele, kafene dhe restorante” me 3,1% secili, “Ushqime dhe pije joalkoolike” me 2,9%, “Veshje dhe këpucë” me 2,3%, “Shërbimi arsimor” me 1,8%. Grupi “Mallra dhe shërbime të ndryshme” u rrit me 1,3%, “Komunikimi” me 1,1%, “Shëndeti” me 0,8%. Nga ana tjetër, çmimet e grupit “Transporti” u ulën me 1,1%, pasuar nga grupi “Qira, ujë, lëndë djegëse dhe energji” me 0,1%.
Në muajin shkurt 2025, ndryshimi mujor i matur nga indeksi i Harmonizuar i Çmimeve të Konsumit është 0,3%. Ky ndryshim është ndikuar kryesisht nga rritja e çmimeve të grupit “Ushqime dhe pije joalkoolike” me 0,8%, pasuar nga grupet “Pije alkoolike dhe duhan” me 0,4%, “Shëndeti” me 0,3%. Grupi “Mobilim, pajisje shtëpie dhe mirëmbajtje, “Argëtim dhe kulturë”, “Hotele, kafene dhe restorante” dhe “Mallra dhe shërbime të ndryshme” me 0,2% secili. Nga ana tjetër, çmimet e grupit “Qira, ujë, lëndë djegëse dhe energji” u ulën me 0,9%, pasuar nga grupi “Veshje dhe këpucë” me 0,6%.
Për muajin shkurt rritja më e madhe çmimeve ishte në Hungari me rreth 5.8 për qind e ndjekur nga Rumania, Estonia, Kroacia dhe Belgjika me mbi 4%, ndërsa në krahun tjetër u rendit Zvicra me rritjen më të ulët të çmimeve me vetëm 0.2%, Franca me 1%. Në BE inflacioni mesatar shënoi 2.7% në shkurt 2025.
Të dhënat e çmimeve IÇK dhe IHÇK llogariten bazuar në çmimet e mbledhura në të njëjtat njësi tregtare, përdorin të njëjtën klasifikim të produkteve dhe ndajnë të njëjtën metodologji të hartimit të indeksit. IÇK është matësi zyrtar i inflacionit në Shqipëri, ndërsa IHÇK përdoret për monitorimin e lëvizjes së çmimeve me pakicë në vendet Evropiane, duke krahasuar përqindjen e inflacionit ndërmjet vendeve.
IÇK përmban 331 produkte, ndërsa IHÇK përmban 329 produkte. Në IÇK mbulohen vetëm shpenzimet e familjeve private shqiptare të kryera brenda dhe jashtë territorit të vendit. IHÇK mbulon të gjitha shpenzimet e bëra brenda territorit të vendit nga familjet shqiptare, përfshirë familjet private, kolektive dhe shpenzimet e turistëve në Shqipëri.
Postimi ” Metoda e Eurostat, inflacioni në shkurt 2.4%, treguesi më i lartë se matjet e INSTAT ” eshte marre nga Revista Monitor.
