Fermerët shqiptarë do të kenë mundësi të përdorin produktet bujqësore, si ato ende në proces prodhimi ashtu edhe ato të magazinuara, si kolateral për të siguruar financim. Kjo parashikohet në projektligjin “Për dëftesat tregtare mbi produktet bujqësore”.
Gjatë fjalës së tij në seancën e sotme në Kuvend, ministri i Bujqësisë dhe Zhvillimit Rural, Andis Salla tha se nisma synon të krijojë një instrument të ri financiar që lehtëson aksesin e fermerëve në financim gjatë ciklit të prodhimit, në një periudhë kur ata përballen me shpenzimet më të mëdha për fara, fidanë, plehra kimike, produkte për mbrojtjen e bimëve dhe punimet e tokës, ndërkohë që ende nuk kanë realizuar të ardhura nga shitja e prodhimit.
Sipas tij, projektligji parashikon dy instrumente kryesore: dëftesën tregtare mbi produktin bujqësor të ardhshëm dhe dëftesën tregtare mbi produktin bujqësor të magazinuar. Në të dy rastet, produkti bujqësor mund të përdoret si garanci për sigurimin e financimit, duke krijuar një mekanizëm të ri kolaterali për sektorin.
Një tjetër risi është se i gjithë procesi do të zhvillohet në mënyrë elektronike përmes portalit e-Albania. Dëftesat tregtare do të regjistrohen në një regjistër elektronik të posaçëm dhe do të lidhen me regjistrin e barrëve siguruese, me synimin për të shmangur përdorimin e shumëfishtë të të njëjtit kolateral dhe për të rritur sigurinë juridike të transaksioneve.
“Projektligji mbështetet mbi dy instrumente kryesore.
I pari është dëftesa tregtare mbi produktin bujqësor të ardhshëm. Ndërsa, instrumenti i dytë është dëftesa tregtare mbi produktin bujqësor të magazinuar.
Në këtë rast, produkti që është prodhuar dhe depozituar në magazinë mund të përdoret si kolateral për financim. Në këtë mënyrë, ligji mbulon të gjithë ciklin ekonomik të prodhimit bujqësor, nga mbjellja deri te shitja e produktit.
Një risi tjetër e rëndësishme është se i gjithë ky mekanizëm do të funksionojë në mënyrë elektronike, nëpërmjet portalit e-Albania, duke garantuar procedura të thjeshta, transparente dhe të aksesueshme për të gjithë përdoruesit.
Dëftesat do të regjistrohen në një regjistër elektronik të posaçëm dhe do të lidhen me regjistrin e barrëve siguruese, duke krijuar siguri juridike dhe duke shmangur përdorimin e shumëfishtë të të njëjtit kolateral.
Po aq i rëndësishëm është edhe fakti që dëftesa tregtare përbën titull ekzekutiv, çka do të thotë se të drejtat dhe detyrimet e palëve mbështeten mbi një mekanizëm të qartë ligjor, duke rritur sigurinë e marrëdhënieve financiare dhe duke krijuar më shumë besim si për fermerin, ashtu edhe për subjektin që ofron financimin.
Ky projektligj synon të krijojë një mjedis më të sigurt për investimet në bujqësi, të forcojë besimin ndërmjet aktorëve të tregut dhe të lehtësojë aksesin në financim për një sektor që vazhdon të përballet me sfida të veçanta.
Po kështu, parashikohen mekanizma të qartë për monitorimin e kolateralit, përmbushjen e detyrimeve dhe zgjidhjen e mosmarrëveshjeve, duke garantuar që instrumenti të funksionojë në mënyrë të sigurt dhe të balancuar për të gjitha palët.
Përfituesit e këtij projektligji janë të shumtë.
Përfituesi i parë është fermeri shqiptar gjithashtu furnizuesit e inputeve, grumbulluesit, përpunuesit dhe eksportuesit, të cilët do të zhvillojnë marrëdhënie kontraktore më të sigurta dhe më të strukturuara me fermerët, duke ulur pasiguritë dhe duke rritur bashkëpunimin përgjatë gjithë zinxhirit agro-ushqimor.
Përfitojnë institucionet financiare, pasi krijohet një instrument i qartë dhe i mbështetur në ligj, që u jep më shumë garanci në financimin e sektorit bujqësor.
Por në fund përfiton e gjithë ekonomia shqiptare.
Ky projektligj është gjithashtu në përputhje me objektivin tonë për modernizimin e bujqësisë dhe afrimin e saj me praktikat më të mira evropiane.
Në të gjithë Bashkimin Evropian, zhvillimi i sektorit nuk mbështetet vetëm te subvencionet, por edhe te instrumentet financiare që krijojnë besim në treg dhe lehtësojnë investimet private.
Ky projektligj plotëson një hallkë që deri më sot ka munguar. Ai krijon një instrument që forcon marrëdhëniet ekonomike, lehtëson financimin dhe i jep më shumë siguri të gjithë aktorëve që operojnë në bujqësi”, tha ndër të tjera gjatë fjalës së tij në Kuvend ministri Salla.
Postimi ” Ministri Salla: Fermerët do të përdorin prodhimin bujqësor si kolateral për financim ” eshte marre nga Revista Monitor.
