Edhe pse çmimet e naftës kanë shënuar rënie në bursat ndërkombëtare, kjo nuk do të thotë se ulja do të ndihet menjëherë edhe në Kosovë. Autoritetet thonë se çmimet në vend bazohen në koston mesatare të derivateve të importuara dhe jo në lëvizjet ditore të tregjeve globale.
Rënia e çmimit të naftës në bursat ndërkombëtare nuk pritet të reflektohet në tregun e Kosovës. Këtë të hënë çmimi i naftës është caktuar në 1.78 euro për litër, çmim i njëjtë sikur një ditë më parë. Ndërkaq, benzina do të tregtohet me çmim maksimal prej 1.50 euro për litër, ndërsa gazi me 0.60 euro për litër. Sipas ministrisë, këto çmime hyjnë në fuqi nga ora 10:00.
Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari, ka thënë se rënia e çmimit të naftës në bursat ndërkombëtare nuk pritet të reflektohet menjëherë në tregun e Kosovës.
Ajo deklaroi se kjo ndodh për shkak të mënyrës së furnizimit dhe formulës së përllogaritjes së çmimit në vend. Shtoi se çmimi i derivateve në Kosovë përcaktohet sipas mesatares së çmimit të dhjetë milionë litrave të importuara, të cilit i shtohet marzhi i fitimit i përcaktuar me rregullore.
“Çmimi i naftës në Kosovë përcaktohet sipas rregullores që kemi në Ministrinë e Industrisë, Ndërmarrësisë, Tregtisë dhe Inovacionit. Ai bazohet në çmimin mesatar të dhjetë milionë litrave të importuara dhe më pas i shtohet marzha e fitimit për operatorët. Krahasimi i çmimit në bursat ndërkombëtare me atë në Kosovë nga njëra ditë në tjetrën nuk është i drejtë, sepse porositë dhe dërgesat bëhen disa ditë më herët. Derivatet që vijnë kryesisht përmes portit të Durrësit janë blerë dhe negociuar paraprakisht, ndaj edhe u duhet kohë derisa të arrijnë në tregun tone”.
Kusari tha se ministria ka ndërmarrë masat e vetme që i lejon baza ligjore për të parandaluar abuzimin me çmimet, teksa shtoi se operatorët ekonomikë vazhdojnë të kërkojnë heqjen e kufizimit të marzhit të fitimit.
“Kemi kërkesa të vazhdueshme nga operatorët ekonomikë që të hiqet kufizimi i marzhit të fitimit, në mënyrë që të kenë fitime më të mëdha. Ne jemi duke i analizuar këto kërkesa. Ndërkohë, importi i naftës dhe derivateve është rritur dukshëm, pothuajse është dyfishuar në baza ditore sipas të dhënave që marrim nga Dogana e Kosovës. Qëllimi ynë është të gjejmë një balancë: të mbrojmë qytetarët nga çdo abuzim i mundshëm me çmimet, por njëkohësisht të mos rrezikojmë funksionimin e operatorëve ekonomikë”.
Çmimi i naftës në tregjet botërore, përfshirë edhe Kosovën është i lidhur ngushtë me lirinë e qarkullimit në Gjirin e Hormuzit, nëpër të cilin kalojnë rreth 20 për qind e rezervave të naftës në nivel global.
Telashet me këtë pjesë të detit, që ndodhet mes Omanit dhe Iranit, nisën pasi Irani u sulmua nga Shtetet e Bashkuara të Amerikës dhe Izraeli më 28 shkurt 2026.
Postimi ” Nafta mbetet 1.78 euro për litër, rënia në bursat botërore ende pa efekt në Kosovë ” eshte marre nga Revista Monitor.
