Tirana përfaqëson vetëm pamjen e sipërfaqes sa i përket treguesve të mirëqenies, ndërsa pabarazia ekonomike dhe varfëria shfaqen më thellë në rrethe. Sipas të dhëna të Institutit të Statistikave, gjatë vitit të kaluar vetëm Tirana, Fieri, Durrësi, Korça dhe Shkodra patën nivele shpenzimesh për familje afër mesatares kombëtare.

Studiuesja e çështjeve ekonomike, Xhonsila Hoxha, u shpreh se: Kemi vetëm Tiranën mbi mesataren kombëtare dhe gjithë qarqet e tjerë nën mesatare. Ky është shkak kryesor se pse sot të vitin 2024 ne kemi këto çrregullime demografike.

Qytetarët e rajoneve si Durrësi, Vlora, Berati, Korça, Dibra, Elbasani, Lezha dhe Kukësi regjistruan shpenzime mujore ndjeshëm më të ulëta. Kukësi rezulton qarku më i varfër në shkallë vendi, ku shpenzimet mujore mesatare të familjeve vitin e kaluar ishin rreth 76 mijë lekë, krahasuar me afro 111 mijë lekë në Tiranë dhe 95 mijë lekë që është mesatarja kombëtare.

Thuajse gjithë qarqet e veriut po përballen me këtë problem. Kjo për shkak të lënies në harresë për kaq shumë kohë, u shpreh Hoxha, duke shtuar se shpopullimi mbetet pasojë e drejtpërdrejtë e kësaj situate.

Eksperti i politikave vendore, Agron Haxhimali, theksoi se ky fenomen përbën një sfidë madhore kombëtare. Kjo është dilema e madhe në qarqe, por edhe në nivel kombëtar. Në raport me atë që prodhohet në qarqe, ajo që kthehet në interesin publik është shumë e pakët. Ndaj ka edhe kështu disbalancash, deklaroi ai.

Të dhënat e Avokatit të Popullit tregojnë se një në tre shqiptarë jetoi në kushte të vështira ekonomike gjatë vitit të shkuar, si pasojë e nivelit të ulët të ndihmës ekonomike, pagave dhe buxheteve të kufizuara të bashkive për mbrojtjen sociale.

Kemi dështim të politikave të zhvillimit të rajoneve. Nuk dimë se ku duhet të mbështet zhvillimi i atij qarku, Kjo ka bërë që njerëzit të kenë më pak të ardhura e rrjedhimisht të shpenzojnë më pak, shtoi Haxhimali.

Një tjetër problematikë e lidhur me këtë situatë është rritja e numrit të familjeve që kërkojnë ndihmë ekonomike, çka sjell ngarkesë shtesë për Buxhetin e Shtetit dhe ndikon në frenimin e investimeve publike.