Parkim me panele diellore. Kështu do të jetë godina e re, që pritet të ndërtohet pranë stacionit të trenit në Durrës. Një projekt i ndërmarrë nga Fondi Shqiptar i Zhvillimit dhe Bashkia Durrës pritet të ketë të vendosura 1500 metër katrorë panele diellore, që do të furnizojnë këtë parking me energji. Detajet e reja janë bërë të ditura nga kryeministri Edi Rama në një postim në rrjetet sociale teksa shkruan se godina do të ketë 400 vende për parkim, por dhe hapësira për shërbime dhe evente të ndryshme.
Në vlerën e 582 milionë lekëve tenderi i publikuar në agjencinë e prokurimeve publike përfshin edhe punimet plotësuese për parkimin pranë zonës historike të qytetit të Vlorës. Ky projekt i ndarë në faza do të përfshijë “Ndërtimin e godinës së parkimit pranë Stacionit të trenit, Durrës dhe punime plotësuese në Parkimin publik nëntokësor i Qendrës Multifunksionale, Vlorë”. I gjithë projekti zhvillohet sipas FSHZH për “Ndërhyrje për ndërtimin e Infrastrukturës së Transportit, Parkimeve, Stacioneve multimodela, moleve, etj,”
Kjo ndërhyrje në nivel rajonal ka si synim përmirësimin e sistemit të transportit në përgjithësi: parkime, stacione multimodale, rrugë bicikletash, stacione autobuzi etj.
Teksa këto dy qytete e kanë shërbimin e parkimit një sfidë përgjatë sezonit turistik, sipas Fondit, në nivel vendor infrastruktura e transportit publik në afatgjatë ka nevojë për transformime rrënjësore duke e bërë metodën më të përdorur si për transport urban ashtu edhe për atë interurban, duke nisur si fillim me përmirësimin e sistemit të parkimit në zona me fluks të madh.
Projekti cilësohet me rëndësi për zhvillimin e qëndrueshëm socio-ekonomik në nivel rajonal dhe lokal, pasi këto dy projekte janë në harmoni me një sërë ndërhyrjesh të tjera që FSHZH po implementon në këto qytete.
Marinela Lina / SCAN
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
