Pas reformës që redukton ndjeshëm numrin e ndërmarrjeve në sektorin e ujësjellës-kanalizimeve, Ministria e Infrastrukturës dhe Energjisë ka miratuar treguesit e rinj të performacës që duhet të përmbushin shoqëritë rajonale të krijuara. Uji pa të ardhura, niveli i faturimit, eficienca e stafit dhe norma e arkëtimit të faturave korrente dhe atyre të përgjithshme, janë treguesit që nuk kanë pësuar ndryshim.
Ndërkohë që, sipas vendimit të ri janë shtuar disa tregues të rinj, si dhe janë hequr disa që aplikoheshin deri më tani. Ajo që bie në sy është fakti se pjesë e këtyre treguesve nuk do të jenë më: Kohëzgjatja e furnizimit me ujë, mbulimi me furnizim me ujë dhe mbulimi me kanalizime.
Gjithashtu, tregues performance nuk do të jetë më mbulimi i plotë i kostove të operimit dhe mirëmbajtjes, por vetëm likujdimi i faturës korrente të OSHEE-së. Ndërkaq, një tregues që është shtuar në këtë drejtim është reduktimi i debisë ndaj OSHEE-së, ku vlen të theksohet se borxhet e ujësjellësve për faturat e energjisë janë në nivele tejet të larta.
Gjithsesi, ndonëse i është kushtuar rëndësi moskrijimit të borxheve të reja, si dhe uljes së stokut të atyre ekzistuese në drejtim të faturave të energjisë elektrike, indikatorët e rinj kanë lënë jashtë eficiencën e energjisë.
Për herë të parë, gjatë vitit 2022 Enti Rregullator i Ujit përfshiu këtë tregues, duke iu referuar metodologjisë së re të tarifave, si dhe duke specifikuar se ai merr një vëmendje të veçantë edhe në përgjigje të krizës globale të energjisë elektrike. Për vitin 2022 eficienca e energjisë për furnizimin me ujë në sektor është 0.69 kWh/m³. Jashtë indikatorëve janë lënë edhe ankesat e klientëve, që gjithashtu u përfshinë për herë të parë gjatë vitit që shkoi.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
