Përshtatja me tregun europian, sfidat dhe mundësitë për bizneset shqiptare

Ndërkohë që Shqipëria ndodhet në fazën finale të procesit të anëtarësimit në Bashkimin Europian, sipërmarrjet vendase po angazhohen për t'u përshtatur me rregulloret dhe standardet e tregut europian, me fokus te siguria, certifikimi dhe cilësia e produkteve Made in Albania.

Ministrja e Ekonomisë dhe Inovacionit, Delina Ibrahimaj, u shpreh se ky proces shkon përtej thjesht zbatimit të ligjeve. “Përmbushja e standardeve, sigurisht, nuk ka të bëjë vetëm me respektimin e legjislacionit apo me plotësimin e kutive. Ka të bëjë me të qenit më konkurrues. Ka të bëjë me hyrjen në tregjet europiane. Ka të bëjë me përfitimin e avantazhit të të parëve që lëvizin. Disa vite më parë, ESG dukej disi e largët, diçka që nuk na shqetësonte, diçka shumë larg realitetit shqiptar, por ne po ecim përpara dhe po ecim drejt BE-së”, deklaroi ajo.

Për të mbështetur këtë tranzicion dhe për të rritur konkurrueshmërinë, qeveria ka vënë në zbatim programin “Dyfisho Biznesin”. Ky instrument u mundëson kompanive fonde për investime, përfshirë mbulimin e kostove për certifikimet e nevojshme.

“Një pjesë e rëndësishme e mbështetjes lidhet edhe me financimin. “Dyfisho Biznesin”, i cili u mundëson bizneseve të aplikojnë për kredi me interes 2% dhe me 70% të kolateralit të mbuluar përmes garancisë sovrane. Në kuadër të këtij programi, një nga synimet është edhe financimi i certifikimeve që u mundësojnë kompanive të përmbushin standardet e kërkuara”, u shpreh ministrja Ibrahimaj.

Megjithatë, ekspertët e fushës tërheqin vëmendjen se ky rrugëtim paraqet pengesa të mëdha, sidomos për ndërmarrjet e vogla dhe të mesme që vuajnë nga mungesa e likuiditetit dhe deficit i fuqisë punëtore.

Ekspertja për punësimin, Gertjana Hasalla, tha se “Nga studimet që janë bërë, 85% e bizneseve do ta kenë shumë të vështirë të përshtaten me këtë treg të madh europian ose të ecin përpara. Pra, shumë prej tyre do të duhet të mbyllen, ndërsa shumë prej atyre që janë të vetëpunësuar do të mbeten pa punë dhe do të duhet të punësohen në vende të tjera ose të marrin rrugën e emigrimit”.

Sipas shifrave zyrtare nga Instituti i Statistikave, rreth 98% e strukturës së bizneseve në vend përbëhet nga ndërmarrje të vogla dhe të mesme, të cilat përbëjnë shtyllën kurrizore të ekonomisë, duke e bërë përshtatjen me kërkesat e BE-së një sfidë kritike për kapacitetet e tyre financiare dhe njerëzore.